لے قضا احسان تجھ پر کر چلے

لے قضا احسان تجھ پر کر چلے

ہم ترے آنے سے پہلے مر چلے

کوچۂ جاناں میں جانا ہے ضرور

چاہے آرا سر پہ یا خنجر چلے

بس یہ ہے کوئے بتاں کی سرگزشت

سر پہ میرے سیکڑوں پتھر چلے

کوئے جاناں کا نہ پایا کچھ نشان

خضر کے ہمراہ ہم دن بھر چلے

پائی تیرے در پہ آ کر زندگی

او مسیحا کھا کے ہم ٹھوکر چلے

دیکھیے دیکھیں گے کیا روز جزا

یاں بشر آئے وہاں با شر چلے

ہو خزاں کیوں کر نہ گلشن کی بہار

جب یہاں باد صبا سرسر چلے

بزم سے جاتے ہو دزدیدہ نظر

نیم بسمل کر چلے کیا کر چلے

قول واعظ نے نہ کچھ تاثیر کی

کشتۂ کاکل پہ کب منتر چلے

خوں تری ترچھی نگاہوں نے کیا

لاکھ خنجر ایک کشتہ پر چلے

فرش پر ہے یوں خراماں رشک ماہ

عرش پر جیسے کوئی اختر چلے

کب ہوئی سودائے مژگاں سے شفا

نشتروں پر سیکڑوں نشتر چلے

le qaza ehsan tujh par kar chale

ham tire ane se pahle mar chale

kucha-e-janan mein jana hai zarur

chahe ara sar pe ya khanjar chale

bas ye hai ku-e-butan ki sarguzasht

sar pe mere saikron patthar chale

ku-e-janan ka na paya kuchh nishan

khizr ke hamrah ham din bhar chale

pai tere dar pe a kar zindagi

o masiha kha ke ham thokar chale

dekhiye dekhenge kya roz-e-jaza

yan bashar ae wahan ba shar chale

ho khizan kyun kar na gulshan ki bahar

jab yahan bad-e-saba sarsar chale

bazm se jate ho duzdida nazar

nim bismil kar chale kya kar chale

qaul waiz ne na kuchh tasir ki

kushta-e-kakul pe kab mantar chale

khun tiri tirchhi nigahon ne kiya

lakh khanjar ek kushta par chale

farsh par hai yun khiraman rashk-e-mah

arsh par jaise koi akhtar chale

kab hui sauda-e-mizhgan se shifa

nashtaron par saikron nashtar chale