لیکھے کی یاں بہی نہ زر و مال کی کتاب

لیکھے کی یاں بہی نہ زر و مال کی کتاب

ہے اپنے حق میں وا شد دل فال کی کتاب

بلبل کا زیر بال نہ بے جا سمجھ تو ہے

اس کے مطالعے میں پر و بال کی کتاب

مذکور زلف ہے مرے دیواں میں سر بسر

ہر صفحہ اس کا کیوں نہ بنے جال کی کتاب

فرصت ملی تو خامۂ بال تدرو سے

عاشق ترے لکھیں گے تری چال کی کتاب

جز یسفک الدما کی آیہ نہ وہ پڑھے

قرآں ہو گرچہ اس بت قتال کی کتاب

شکل عروس چھٹ نہ خوش آوے مجھے کبھی

رکھ دیں جو میرے سامنے اشکال کی کتاب

دیکھے جو غور سے کوئی دیواں مرے تو ہاں

ہر بیت ہے زمانے کے احوال کی کتاب

شرم گنہ سے آب ہوا گرچہ میں ولے

دھوئی گئی نہ نامۂ اعمال کی کتاب

پایا نہ سعد و نحس سے کوئی ورق تہی

تاروں کی میں نے خوب جو غربال کی کتاب

کس طرح روز حشر وہ ہوویں گے سرخ رو

دیکھا کیے ہیں یاں جو خط و خال کی کتاب

اس دہر میں بلندیٔ اذہان کند سے

میں گرچہ جانتا تھا انہیں فال کی کتاب

ہر جلد مصحفیؔ ترے دیوان کی ولے

نقطوں سے شک کے بن گئی رمال کی کتاب

lekhe ki yan bahi na zar-o-mal ki kitab

hai apne haq mein wa shud-e-dil fal ki kitab

bulbul ka zer-e-bal na be ja samajh to hai

us ke mutalae mein par-o-bal ki kitab

mazkur zulf hai mire diwan mein sar basar

har safha us ka kyun na bane jal ki kitab

fursat mili to khama-e-bal-e-tadro se

ashiq tire likhenge tiri chal ki kitab

juz yasfak aldama ki aya na wo parhe

quran ho garche us but qital ki kitab

shakl-e-urus-e-chhut na khush awe mujhe kabhi

rakh den jo mere samne ishkal ki kitab

dekhe jo ghaur se koi diwan mire to han

har bit hai zamane ke ahwal ki kitab

sharm-e-gunah se ab hua garche mein wale

dhoi gai na nama-e-aamal ki kitab

paya na saad-o-nahs se koi waraq tahi

taron ki main ne khub jo ghirbal ki kitab

kis tarah roz-e-hashr wo howen ge surkh ru

dekha kiye hain yan jo khat-o-khal ki kitab

is dahr mein bulandi-e-azhan kand se

main garche janta tha unhen fal ki kitab

har jald mushafi tire diwan ki wale

nuqton se shak ke ban gai rammal ki kitab