مآل سوز غم ہائے نہانی دیکھتے جاؤ

مآل سوز غم ہائے نہانی دیکھتے جاؤ

بھڑک اٹھی ہے شمع زندگانی دیکھتے جاؤ

چلے بھی آؤ وہ ہے قبر فانیؔ دیکھتے جاؤ

تم اپنے مرنے والے کی نشانی دیکھتے جاؤ

ابھی کیا ہے کسی دن خوں رلا دے گی یہ خاموشی

زبان حال کی جادو بیانی دیکھتے جاؤ

غرور حسن کا صدقہ کوئی جاتا ہے دنیا سے

کسی کی خاک میں ملتی جوانی دیکھتے جاؤ

ادھر منہ پھیر کر کیا ذبح کرتے ہو ادھر دیکھو

مری گردن پہ خنجر کی روانی دیکھتے جاؤ

بہار زندگی کا لطف دیکھا اور دیکھو گے

کسی کا عیش مرگ ناگہانی دیکھتے جاؤ

سنے جاتے نہ تھے تم سے مرے دن رات کے شکوے

کفن سرکاؤ میری بے زبانی دیکھتے جاؤ

وہ اٹھا شور ماتم آخری دیدار میت پر

اب اٹھا چاہتی ہے نعش فانیؔ دیکھتے جاؤ

maal-e-soz-e-gham ha-e-nihani dekhte jao

bharak uthi hai sham-e-zindagani dekhte jao

chale bhi ao wo hai qabr fani dekhte jao

tum apne marne wale ki nishani dekhte jao

abhi kya hai kisi din khun rula degi ye khamoshi

zaban-e-hal ki jadu bayani dekhte jao

ghurur-e-husn ka sadqa koi jata hai duniya se

kisi ki khak mein milti jawani dekhte jao

idhar munh pher kar kya zabh karte ho idhar dekho

miri gardan pe khanjar ki rawani dekhte jao

bahar-e-zindagi ka lutf dekha aur dekhoge

kisi ka aish marg-e-nagahani dekhte jao

sune jate na the tum se mire din rat ke shikwe

kafan sarkao meri be zabani dekhte jao

wo utha shor-e-matam akhiri didar mayyat par

ab utha chahti hai naash fani dekhte jao