مانا سحر کو یار اسے جلوہ گر کریں

مانا سحر کو یار اسے جلوہ گر کریں

طاقت ہمیں کہاں کہ شبِ غم سحر کریں

تزئین میری گور کی لازم ہے خوب سی

تقریبِ سیر ہی سے وہ شاید گزر کریں

اب ایک اشک ہے دُرِ نایاب، وہ کہاں

تارِ نظر جو گریہ سے سلکِ گہر کریں

وہ دوست ہیں انہیں جو اثر ہو گیا تو کیا

نالے ہیں وہ جو غیر کے دل میں اثر کریں

آئے تو ان کو رنج، نہ آئے تو مجھ کو رنج

مرنے کی میرے کاش نہ ان کو خبر کریں

ہے جی میں سونگھیں نکہتِ گل جا کے باغ میں

بس کب تک التجائے نسیمِ سحر کریں

اب کے ارادہ ملکِ عدم کا ہے شیفتہ

گھبرا گئے کہ ایک جگہ کیا بسر کریں

mana sahar ko yar use jalwa gar karen

taqat hamen kahan ke shab-e-gham sahar karen

tazin meri gor ki lazim hai khub si

taqrib-e-sair hi se wo shayad guzar karen

ab ek ashk hai dur-e-nayab, wo kahan

tar-e-nazar jo girya se silk-e-guhar karen

wo dost hain unhen jo asar ho gaya to kya

nale hain wo jo ghair ke dil mein asar karen

ae to un ko ranj, na ae to mujh ko ranj

marne ki mere kash na un ko khabar karen

hai ji mein sunghen nikhat-e-gul ja ke bagh mein

bas kab tak iltija-e-nasim-e-sahar karen

ab ke irada mulk-e-adam ka hai shefta

ghabra gae ke ek jagah kya basar karen