لٹاؤ جان تو بنتی ہے بات کس نے کہا

لٹاؤ جان تو بنتی ہے بات کس نے کہا

یہ بزم عشق میں راز حیات کس نے کہا

رہ طلب میں سناتا کوئی ترانۂ نو

یہاں فسانۂ ذات و صفات کس نے کہا

ابھی ثوابت و سیار میں ہے فصل بہت

سمٹ چکی ہے بہت کائنات کس نے کہا

ہر اک چوٹ پہ کھلتی ہے آنکھ انساں کی

ہیں خضر راہ طلب حادثات کس نے کہا

ہم آسماں کو زمیں پر اتار لائے مگر

ابھی نہیں ہے شعور حیات کس نے کہا

ہم اپنی دھن میں ہیں مصروف کس طرف دیکھیں

ہمیں نہیں ہے غم التفات کس نے کہا

ہمیں سکون میسر نہیں مگر اخترؔ

ہمارے دور کو دور نجات کس نے کہا

lutao jan to banti hai bat kis ne kaha

ye bazm-e-ishq mein raz-e-hayat kis ne kaha

rah-e-talab mein sunata koi tarana-e-nau

yahan fasana-e-zat-o-sifat kis ne kaha

abhi sawabit-o-sayyar mein hai fasl bahut

simat chuki hai bahut kainat kis ne kaha

har ik chot pe khulti hai ankh insan ki

hain khizr-e-rah-e-talab hadsat kis ne kaha

ham asman ko zamin par utar lae magar

abhi nahin hai shuur-e-hayat kis ne kaha

ham apni dhun mein hain masruf kis taraf dekhen

hamen nahin hai gham-e-iltifat kis ne kaha

hamen sukun-e-muyassar nahin magar akhtar

hamare dur ko daur-e-najat kis ne kaha