لڑائیں آنکھ وہ ترچھی نظر کا وار رہنے دیں

لڑائیں آنکھ وہ ترچھی نظر کا وار رہنے دیں

لڑکپن ہے ابھی نام خدا تلوار رہنے دیں

کہیں کس منہ سے اپنا آئینہ بردار رہنے دیں

تمنا ہے غلامی میں ہمیں سرکار رہنے دیں

وہ کیوں بیخودؔ کو محو لذت دیدار رہنے دیں

وہ دیوانے نہیں غافل کو جو ہشیار رہنے دیں

مرے دم تک وفا و عشق بھی دنیا میں باقی ہیں

مسیحائی یہی ہے وہ مجھے بیمار رہنے دیں

قیامت آ گئی اب تو گلا مردار کا کاٹیں

کہاں تک موت کو زندہ ترے بیمار رہنے دیں

اسی پردے نے عمر خضر شوق دید کو بخشی

قیامت تک وہ اپنی گرمئ بازار رہنے دیں

سن اے قاصد انہیں ضد ہے تو ہم کو بات کی پچ ہے

مناسب وہ اگر سمجھیں تو یہ تکرار رہنے دیں

مرے ماتم کی کیا جلدی ہے کیوں زیور بڑھاتے ہیں

ابھی آراستہ وہ حسن کا بازار رہنے دیں

اگر منکر نکیر آتے ہیں تربت میں تو آ جائیں

نہ چھیڑیں وہ مجھے محو جمال یار رہنے دیں

قفس میں بیکسوں کو کس نے پوچھا کون پوچھے گا

کہاں تک زخم کی صورت میں وا منقار رہنے دیں

نگاہ شرم کے زخمی ہیں، تیغ ناز کے بسمل

تڑپنے کے لیے ہم کو پس دیوار رہنے دیں

یہ فقرے ہیں، یہ چالیں ہیں، نظر لاکھوں میں اٹھ جاتی

عدو کے سامنے وہ ہو گئے نا چار رہنے دیں

جگر میں درد دل میں ٹیس دم گھٹنے لگا اپنا

بھلا ہم ایک گھر میں اور دو بیمار رہنے دیں

محبت سے ہمیں نفرت حسینوں سے ہمیں وحشت

دل آزاری کی باتیں اب یہ دل آزار رہنے دیں

ہمارے کان لفظ بے وفا سن ہی نہیں سکتے

یہ خلعت تو عدو کے واسطے سرکار رہنے دیں

مری تربت پہ ان کو صرف بے جا کی ضرورت کیا

کبھی کام آئے گا یہ فتنۂ رفتار رہنے دیں

مقدر کو بدل دیں وہ زمانے کو خفا کر دیں

مگر اپنے تصور کو مرا غم خوار رہنے دیں

نظر ان کی کہیں پتلی کہیں آنکھیں کہیں ان کی

یہ گردش دوسری صورت کی ہے پرکار رہنے دیں

وہ کیوں مجھ کو تسلی دیں وہ کیوں پوچھیں مرے آنسو

گھرا ہے ابر غم آنکھوں کو گوہر بار رہنے دیں

کوئی بیخودؔ کی جانب سے ذرا سمجھائے واعظ کو

عبادت کو فرشتے ہیں اسے مے خوار رہنے دیں

laraen ankh wo tirchhi nazar ka war rahne den

larakpan hai abhi nam-e-khuda talwar rahne den

kahin kis munh se apna aina bardar rahne den

tamanna hai ghulami mein hamen sarkar rahne den

wo kyun bekhud ko mahw-e-lazzat-e-didar rahne den

wo diwane nahin ghafil ko jo hushyar rahne den

mire dam tak wafa-o-ishq bhi duniya mein baqi hain

masihai yahi hai wo mujhe bimar rahne den

qayamat a gai ab to gila murdar ka katen

kahan tak maut ko zinda tire bimar rahne den

isi parde ne umr-e-khizr shauq-e-did ko bakhshi

qayamat tak wo apni garmi-e-bazar rahne den

sun ai qasid unhen zid hai to ham ko bat ki pich hai

munasib wo agar samjhen to ye takrar rahne den

mire matam ki kya jaldi hai kyun zewar barhate hain

abhi arasta wo husn ka bazar rahne den

agar munkir nakir ate hain turbat mein to a jaen

na chheren wo mujhe mahw-e-jamal-e-yar rahne den

qafas mein bekason ko kis ne puchha kaun puchhega

kahan tak zakhm ki surat mein wa minqar rahne den

nigah-e-sharm ke zakhmi hain, tegh-e-naz ke bismil

tarapne ke liye ham ko pas-e-diwar rahne den

ye fiqre hain, ye chalen hain, nazar lakhon mein uth jati

adu ke samne wo ho gae na char rahne den

jigar mein dard-e-dil mein tis dam ghatne laga apna

bhala ham ek ghar mein aur do bimar rahne den

mohabbat se hamen nafrat hasinon se hamen wahshat

dil azari ki baten ab ye dil azar rahne den

hamare kan lafz-e-be wafa sun hi nahin sakte

ye khilat to adu ke waste sarkar rahne den

miri turbat pe un ko sirf-e-be ja ki zarurat kya

kabhi kam aega ye fitna-e-raftar rahne den

muqaddar ko badal den wo zamane ko khafa kar den

magar apne tasawwur ko mira gham khwar rahne den

nazar un ki kahin putli kahin ankhen kahin un ki

ye gardish dusri surat ki hai parkar rahne den

wo kyun mujh ko tasalli den wo kyun puchhen mire ansu

ghira hai abr-e-gham ankhon ko gauhar bar rahne den

koi bekhud ki janib se zara samjhae waiz ko

ibadat ko farishte hain use mai khwar rahne den