لگی ہے مسی پان کھائے ہوئے ہیں

لگی ہے مسی پان کھائے ہوئے ہیں

سنانے پہ بیڑا اٹھائے ہوئے ہیں

غضب ہے حسینوں سے دل کا لگانا

یہ آفت کے پتلے بنائے ہوئے ہیں

مرے خط کو پھاڑا رقیبوں کے آگے

کسی کی وہ پٹی پڑھائے ہوئے ہیں

الجھنے سے بالوں کے بگڑو نہ صاحب

تمہارے ہی یہ سر چڑھائے ہوئے ہیں

کلیجہ ہتھیلی پہ رکھ لوں تو جاؤں

وہ ہاتھوں میں مہندی لگائے ہوئے ہیں

شب ہجر جب خواب دیکھا یہ دیکھا

کہ تجھ کو گلے سے لگائے ہوئے ہیں

تری تیغ کی آب جاتی رہی ہے

مرے زخم پانی چرائے ہوئے ہیں

جدھر دیکھتا ہوں انہیں کا ہے جلوہ

وہ نظروں میں ایسے سمائے ہوئے ہیں

اتاریں گے کس کس کو نظروں سے انجمؔ

وہ کیوں آج تیوری چڑھائے ہوئے ہیں

lagi hai missi pan khae hue hain

sunane pe bera uthae hue hain

ghazab hai hasinon se dil ka lagana

ye afat ke putle banae hue hain

mire khat ko phara raqibon ke age

kisi ki wo piti parhae hue hain

ulajhne se balon ke bigro na sahab

tumhare hi ye sar charhae hue hain

kaleja hatheli pe rakh lun to jaun

wo hathon mein mehndi lagae hue hain

shab-e-hijr jab khwab dekha ye dekha

ke tujh ko gale se lagae hue hain

tiri tegh ki ab jati rahi hai

mire zakhm pani churae hue hain

jidhar dekhta hun unhen ka hai jalwa

wo nazron mein aise samae hue hain

utarenge kis kis ko nazron se anjum

wo kyun aj tewri charhae hue hain