لیتے لیتے کروٹیں تجھ بن جو گھبراتا ہوں میں

لیتے لیتے کروٹیں تجھ بن جو گھبراتا ہوں میں

نام لے لے کر ترا راتوں کو چلاتا ہوں میں

غیر جب کہتا ہے اس پر میں بھی مرتا ہوں تب آہ

وہ تو کیا مرتا ہے بس غیرت سے مر جاتا ہوں میں

آ نکلتا ہے کبھی پر بات وہ کرتا نہیں

بولتا ہے تو یہ کہتا ہے کہ اب جاتا ہوں میں

تو وہ ہے آتش کا پرکالہ کہ تیرے سامنے

آفتاب آ کر کہے جاڑے سے تھراتا ہوں میں

ناتوانی نے نکل جانے کا ڈر تو کھو دیا

یار کو اب اپنے مر جانے سے دھمکاتا ہوں میں

گر چلیں راہ طلب میں توڑ ڈالوں اپنے پاؤں

بس کبھی ساقی کے آگے ہاتھ پھیلاتا ہوں میں

ابر کو دیکھا جو ساقی نے نگاہ مست سے

رعد بولا اب مئے گل رنگ برساتا ہوں میں

دوڑتے ہیں پاؤں جب دامان صحرا کی طرف

ہاتھ بھی سوئے گریباں ساتھ دوڑاتا ہوں میں

lete lete karwaten tujh bin jo ghabrata hun main

nam le le kar tira raton ko chillata hun main

ghair jab kahta hai us par main bhi marta hun tab ah

wo to kya marta hai bas ghairat se mar jata hun main

a nikalta hai kabhi par bat wo karta nahin

bolta hai to ye kahta hai ke ab jata hun main

to wo hai atish ka parkala ke tere samne

aftab a kar kahe jare se tharrata hun main

natawani ne nikal jane ka dar to kho diya

yar ko ab apne mar jane se dhamkata hun main

gar chalen rah-e-talab mein tor dalun apne paon

bas kabhi saqi ke age hath phailata hun main

abr ko dekha jo saqi ne nigah-e-mast se

raad bola ab mai-e-gul rang barasita hun main

daurte hain paon jab daman-e-sahra ki taraf

hath bhi su-e-gareban sath daurita hun main