لگے خدنگ جب اس نالۂ سحر کا سا

لگے خدنگ جب اس نالۂ سحر کا سا

فلک کا حال نہ ہو کیا مرے جگر کا سا

نہ جاؤں گا کبھی جنت میں میں نہ جاؤں گا

اگر نہ ہووے گا نقشہ تمہارے گھر کا سا

کرے نہ خانہ خرابی تری ندامت جور

کہ آب شرم میں ہے جوش چشم تر کا سا

یہ جوش یاس تو دیکھو کہ اپنے قتل کے وقت

دعائے وصل نہ کی وقت تھا اثر کا سا

لگے ان آنکھوں سے ہر وقت اے دل صد چاک

ترا نہ رتبہ ہوا کیوں شگاف در کا سا

ذرا ہو گرمی صحبت تو خاک کر دے چرخ

مرا سرور ہے گل خندۂ شرر کا سا

یہ ناتواں ہوں کہ ہوں اور نظر نہیں آتا

مرا بھی حال ہوا تیری ہی کمر کا سا

جنون کے جوش سے بیگانہ وار ہیں احباب

ہمارا حال وطن میں ہوا سفر کا سا

خبر نہیں کہ اسے کیا ہوا پر اس در پر

نشان پا نظر آتا ہے نامہ بر کا سا

دل ایسے شوخ کو مومنؔ نے دے دیا کہ وہ ہے

محب حسین کا اور دل رکھے شمر کا سا

lage khadang jab is nala-e-sahar ka sa

falak ka hal na ho kya mire jigar ka sa

na jaunga kabhi jannat mein main na jaunga

agar na howe ga naqsha tumhare ghar ka sa

kare na khana kharabi tiri nadamat jaur

ke ab sharm mein hai josh-e-chashm-e-tar ka sa

ye josh-e-yas to dekho ke apne qatl ke waqt

dua-e-wasl na ki waqt tha asar ka sa

lage in ankhon se har waqt ai dil-e-sad chak

tira na rutba hua kyun shigaf-e-dar ka sa

zara ho garmi-e-sohbat to khak kar de charkh

mira surur hai gul khanda-e-sharar ka sa

ye natawan hun ke hun aur nazar nahin ata

mira bhi hal hua teri hi kamar ka sa

junun ke josh se begana war hain ahbab

hamara hal watan mein hua safar ka sa

khabar nahin ke use kya hawa par us dar par

nishan-e-pa nazar ata hai nama bar ka sa

dil aise shokh ko momin ne de diya ke wo hai

muhib hasin ka aur dil rakhe shimr ka sa