لیا نہ ہاتھ سے جس نے سلام عاشق کا

لیا نہ ہاتھ سے جس نے سلام عاشق کا

وہ کان دھر کے سنے کیا پیام عاشق کا

قصور شیخ ہے فردوس و حور کی خواہش

تری گلی میں ہے پیارے مقام عاشق کا

غرور حسن نہ کر جذبۂ زلیخا دیکھ

کیا ہے عشق نے یوسف غلام عاشق کا

ترے ہی نام کی سمرن ہے مجھ کو اور تسبیح

تو ہی ہے ورد ہر اک صبح و شام عاشق کا

وفور عشق کو عاشق ہی جانتا ہے نصیرؔ

ہر اک سمجھ نہیں سکتا کلام عاشق کا

liya na hath se jis ne salam ashiq ka

wo kan dhar ke sune kya payam ashiq ka

qusur shaikh hai firdaus-o-hur ki khwahish

tiri gali mein hai pyare maqam ashiq ka

ghurur-e-husn na kar jazba-e-zulekha dekh

kya hai ishq ne yusuf ghulam ashiq ka

tire hi nam ki sumran hai mujh ko aur tasbih

tu hi hai wird har ik subh-o-sham ashiq ka

wafur-e-ishq ko ashiq hi janta hai nasir

har ik samajh nahin sakta kalam ashiq ka