فصل بہار آئی ہے پیمانہ چاہئے

فصل بہار آئی ہے پیمانہ چاہئے

بلبل کے ساتھ نعرۂ مستانہ چاہئے

عشاق شمع حسن کو کیا کیا نہ چاہئے

پرواز رنگ کو پر پروانہ چاہئے

پیری میں رات دن ہمیں پیمانہ چاہئے

رعشہ کے بدلے لغزش مستانہ چاہئے

وحشت میں بات عقل کی سننا نہ چاہئے

کانوں میں پنبۂ کف دیوانہ چاہئے

کنگھی بناؤں چوب عصائے کلیم کی

تسخیر مار گیسوئے جانانہ چاہئے

دریائے وحدت و چمن دہر سے ہمیں

در یگانہ سبزۂ بیگانہ چاہئے

آب و غذائے عاشق دنداں محال ہے

روز آب و دانۂ در یکدانہ چاہئے

میں سائل کمال جنوں ہوں مرے لئے

کجکول کاسۂ سر دیوانہ چاہئے

اسرار حق ہیں دل میں مگر دل ہے بے خبر

اس گنج کے لئے یہی ویرانہ چاہئے

سیر بہشت چاہتے ہیں نشہ میں مدام

مستوں کو چشم حور کا پیمانہ چاہئے

گو بے نقاب رہتے ہو پردے میں ہے حجاب

در پردہ ہم سے آپ کو چھپنا نہ چاہئے

عاشق بنا کے ہم کو جلاتے ہیں شمع رو

پروانہ چاہئے انہیں پروانہ چاہئے

اے پیر مے فروش در توبہ کی طرح

وا روز حشر تک در مے خانہ چاہئے

تا مرگ آشنا نہ ہوا ایک سبزہ رنگ

تربت پر اپنی سبزۂ بیگانہ چاہئے

دشمن ہے وہ تو تم بھی نہ ہو دوست اے منیرؔ

اپنا برا نہ چاہئے اچھا نہ چاہئے

fasl-e-bahar ai hai paimana chahiye

bulbul ke sath naara-e-mastana chahiye

ushshaq sham-e-husn ko kya kya na chahiye

parwaz-e-rang ko par parwana chahiye

piri mein rat din hamen paimana chahiye

raasha ke badle laghzish-e-mastana chahiye

wahshat mein bat aql ki sunna na chahiye

kanon mein pumba-e-kaf-e-diwana chahiye

kanghi banaun chob-e-asa-e-kalim ki

taskhir mar gesu-e-janana chahiye

dariya-e-wahdat-o-chaman-e-dahr se hamen

dar-e-yagana sabza-e-begana chahiye

ab-o-ghiza-e-ashiq-e-dandan muhal hai

roz-e-ab-o-dana-e-dar-e-yakdana chahiye

main sail-e-kamal-e-junun hun mire liye

kajkol kasa-e-sar-e-diwana chahiye

asrar-e-haq hain dil mein magar dil hai be khabar

is ganj ke liye yahi wirana chahiye

sair-e-bahisht chahte hain nasha mein mudam

maston ko chashm-e-hur ka paimana chahiye

go be naqab rahte ho parde mein hai hijab

dar parda ham se ap ko chhupna na chahiye

ashiq bana ke ham ko jalate hain shama ro

parwana chahiye unhen parwana chahiye

ai pir-e-mai farosh dar-e-tauba ki tarah

wa roz-e-hashr tak dar-e-mai khana chahiye

ta marg ashna na hua ek sabza rang

turbat par apni sabza-e-begana chahiye

dushman hai wo to tum bhi na ho dost ai munir

apna bura na chahiye achchha na chahiye