لطف ظاہر کر دیا درد نہانی دیکھ کر

لطف ظاہر کر دیا درد نہانی دیکھ کر

رحم نے پائی ہے قوت ناتوانی دیکھ کر

جو کہ ملتی ہو ہماری سرگزشت عشق سے

قصہ خواں کہنا وہاں ایسی کہانی دیکھ کر

تجھ سے گو ملتے نہیں داغ غم ہجراں تو ہے

شکر ہے جیتے تو ہیں تیری نشانی دیکھ کر

کون ہے خون جگر آشام میں یا مدعی

دیجیو ساقی شراب ارغوانی دیکھ کر

اب بلائے آسمانی بھی بھلی لگنے لگی

آپ کے سر پر دوپٹے آسمانی دیکھ کر

اس رمیدہ وش کو کیا حال دل محزوں لکھوں

جو خفا ہو ربط الفاظ و معانی دیکھ کر

ہے دگر گوں ابتدائے عشق میں رشکیؔ کا حال

رحم آتا ہے مجھے اوس کی جوانی دیکھ کر

lutf zahir kar diya dard-e-nihani dekh kar

rahm ne pai hai quwwat natawani dekh kar

jo ke milti ho hamari sarguzasht-e-ishq se

qissa khwan kahna wahan aisi kahani dekh kar

tujh se go milte nahin dagh-e-gham-e-hijran to hai

shukr hai jite to hain teri nishani dekh kar

kaun hai khun-e-jigar asham mein ya muddai

dijiyo saqi sharab-e-arghawani dekh kar

ab bala-e-asmani bhi bhali lagne lagi

ap ke sar par dupatte asmani dekh kar

is ramida wash ko kya hal-e-dil-e-mahzon likhun

jo khafa ho rabt-e-alfaz-o-maani dekh kar

hai digar gun ibtida-e-ishq mein rashki ka hal

rahm ata hai mujhe os ki jawani dekh kar