لطف گناہ میں ملا اور نہ مزہ ثواب میں

لطف گناہ میں ملا اور نہ مزہ ثواب میں

عمر تمام کٹ گئی کاوش احتساب میں

تیرے شباب نے کیا مجھ کو جنوں سے آشنا

میرے جنوں نے بھر دیے رنگ تری شباب میں

آہ یہ دل کہ جاں گداز جوشش اضطراب ہے

ہائے وہ دور جب کبھی لطف تھا اضطراب میں

قلب تڑپ تڑپ اٹھا روح لرز لرز گئی

بجلیاں تھیں بھری ہوئی زمزمۂ رباب میں

چرخ بھی مے پرست ہے بزم زمیں بھی مست ہے

غرق بلند و پست ہے جلوۂ ماہتاب میں

میرے لیے عجیب ہیں تیری یہ مسکراہٹیں

جاگ رہا ہوں یا تجھے دیکھ رہا ہوں خواب میں

میرے سکوت میں نہاں ہے مرے دل کی داستاں

جھک گئی چشم فتنہ زا ڈوب گئی حجاب میں

لذت جام جم کبھی تلخی زہر غم کبھی

عشرت زیست ہے اثرؔ گردش انقلاب میں

lutf-e-gunah mein mila aur na maza sawab mein

umr tamam kat gai kawish-e-ehtisab mein

tere shabab ne kiya mujh ko junun se ashna

mere junun ne bhar diye rang tiri shabab mein

ah ye dil ke jan gudaz-e-joshish-e-iztirab hai

hae wo dur jab kabhi lutf tha iztirab mein

qalb tarap tarap utha ruh laraz laraz gai

bijliyan thin bhari hui zamzama-e-rabab mein

charkh bhi mai parast hai bazm-e-zamin bhi mast hai

gharq-e-buland-o-past hai jalwa-e-mahtab mein

mere liye ajib hain teri ye muskurahaten

jag raha hun ya tujhe dekh raha hun khwab mein

mere sukut mein nihan hai mire dil ki dastan

jhuk gai chashm-e-fitna za dub gai hijab mein

lazzat-e-jam-e-jam kabhi talkhi-e-zahr-e-gham kabhi

ishrat-e-zist hai asar gardish-e-inqilab mein