لبریز حقیقت گو افسانۂ موسیٰ ہے

لبریز حقیقت گو افسانۂ موسیٰ ہے

اے حسن حجاب آرا کس نے تجھے دیکھا ہے

محفل سی سجائی ہے دیدار کی حسرت نے

ہر چند ترا جلوہ محبوب تماشا ہے

مٹتا ہے کبھی دل سے نقش اس کی محبت کا

ناکام تمنا بھی مجبور تمنا ہے

جذبات کی دنیا میں برپا ہے قیامت سی

اس حال میں رو پوشی کیا آپ کو زیبا ہے

ساقی تری محفل کو رنگین کیا جس نے

وہ خون ہے تقوے کا یا جلوۂ مینا ہے

اک شیوہ تغافل ہے اک عشوہ تجاہل ہے

غصہ ہے بجا تیرا شکوہ مرا بے جا ہے

یہ بے دلی اچھی ہے دیوانہ نہ بن وحشتؔ

انجام تمنا کا حسرت کے سوا کیا ہے

labrez haqiqat go afsana-e-musa hai

ai husn-e-hijab ara kis ne tujhe dekha hai

mahfil si sajai hai didar ki hasrat ne

har chand tira jalwa mahbub tamasha hai

mitta hai kabhi dil se naqsh us ki mohabbat ka

nakam-e-tamanna bhi majbur-e-tamanna hai

jazbat ki duniya mein barpa hai qayamat si

is hal mein ro poshi kiya ap ko zeba hai

saqi tiri mahfil ko rangin kiya jis ne

wo khun hai taqwe ka ya jalwa-e-mina hai

ik shewa taghaful hai ik ishwa tajahul hai

ghussa hai baja tera shikwa mira be ja hai

ye be dili achchhi hai diwana na ban wahshat

anjam tamanna ka hasrat ke siwa kya hai