لطف نہاں سے جب جب وہ مسکرا دئیے ہیں

لطف نہاں سے جب جب وہ مسکرا دئیے ہیں

میں نے بھی زخم دل کے ان کو دکھا دئیے ہیں

کچھ حرف آرزو تھا کچھ یاد عیش رفتہ

جتنے تھے نقش دل میں ہم نے مٹا دیئے ہیں

فرط غم و الم سے جب دل ہوا ہے گریاں

اس نے عنایتوں کے دریا بہا دیئے ہیں

دیکھے ہیں تیرے تیور دھوکا نہ کھائیں گے اب

اٹھتے تھے ولولے کچھ ہم نے دبا دیئے ہیں

اس دل نشیں ادا کا مطلب کبھی نہ سمجھے

جب ہم نے کچھ کہا ہے وہ مسکرا دیئے ہیں

شوخ کر دیا ہے چھڑیوں سے ہم نے تم کو

کچھ حوصلے ہمارے تم نے بڑھا دیئے ہیں

کوئی تجھ کو دیکھے پردہ اٹھانے والے

تو نے تجلیوں کے پردے گرا دیئے ہیں

کرتا ہوں وحشتؔ ان سے عرض نیاز پنہاں

اس کام کے طریقے دل نے بتا دیئے ہیں

lutf-e-nihan se jab jab wo muskura diye hain

main ne bhi zakhm-e-dil ke un ko dikha diye hain

kuchh harf-e-arzu tha kuchh yad aish-e-rafta

jitne the naqsh-e-dil mein ham ne mita diye hain

fart-e-gham-o-alam se jab dil hua hai giryan

us ne inayaton ke dariya baha diye hain

dekhe hain tere tewar dhoka na khaenge ab

uthte the walwale kuchh ham ne daba diye hain

is dil nashin ada ka matlab kabhi na samjhe

jab ham ne kuchh kaha hai wo muskura diye hain

shokh kar diya hai chhariyon se ham ne tum ko

kuchh hausle hamare tum ne barha diye hain

koi tujh ko dekhe parda uthane wale

tu ne tajalliyon ke parde gira diye hain

karta hun wahshat un se arz-e-niyaz-e-pinhan

is kam ke tariqe dil ne bata diye hain