آج صیاد نے بھولے سے چمن دکھلایا

آج صیاد نے بھولے سے چمن دکھلایا

میری تقدیر نے پھر مجھ کو وطن دکھلایا

عین مستی میں جو وہ شوخ ہوا سر کہ جبیں

یہ اڑے ہوش کہ نشے نے ہرن دکھلایا

جھٹ پٹا وقت ہوا موت کا ساماں شب وصل

سحر ہجر کا مردوں نے کفن دکھلایا

چاند کو دیکھتے ہیں لوٹتے انگاروں پر

تم نے کیوں کبک دری کو یہ چلن دکھلایا

آئے واللہ دل حیران میں کیا کچھ ارماں

اس نے آئینے کو تن تن کے جو تن دکھلایا

مرتے جیتے ہی رہے ہم تو اجی دم دم میں

نہ کمر اس نے دکھائی نہ دہن دکھلایا

یاد میں پھول سے گالوں کے سنبھالا دل کو

کبھی نسریں تو کبھی اس کو سمن دکھلایا

پھر ترا شور تبسم جو نمک ریز ہوا

پھر مرا تازہ مجھے زخم کہن دکھلایا

کل جو تھا وعدۂ وصل آج وہ فردا نکلا

دن قیامت کا تو اے وعدہ شکن دکھلایا

کیوں نہ میں خار بنوں چشم رقیباں میں نسیمؔ

پھول سے گال مجھے غنچہ دہن دکھلایا

aj sayyad ne bhule se chaman dikhlaya

meri taqdir ne phir mujh ko watan dikhlaya

ain masti mein jo wo shokh hua sar ke jabin

ye ure hosh ke nashe ne hiran dikhlaya

jhat pita waqt hua maut ka saman shab-e-wasl

sahar hijr ka mardon ne kafan dikhlaya

chand ko dekhte hain lautte angaron par

tum ne kyun kabk-e-dari ko ye chalan dikhlaya

ae wallah dil-e-hairan mein kya kuchh arman

us ne aine ko tan tan ke jo tan dikhlaya

marte jite hi rahe ham to aji dam dam mein

na kamar us ne dikhai na dahan dikhlaya

yad mein phul se galon ke sambhala dil ko

kabhi nasrain to kabhi us ko saman dikhlaya

phir tira shor-e-tabassum jo namak rez hua

phir mira taza mujhe zakhm-e-kuhan dikhlaya

kal jo tha waada-e-wasl aj wo farda nikla

din qayamat ka to ai waada shikan dikhlaya

kyun na main khar banun chashm-e-raqiban mein nasim

phul se gal mujhe ghuncha dahan dikhlaya