غیر نے ہم کو ذبح کیا نے طاقت ہے نے یارا ہے

غیر نے ہم کو ذبح کیا نے طاقت ہے نے یارا ہے

اس کتے نے کر کے دلیری صید حرم کو مارا ہے

باغ کو تجھ بن اپنے بھائیں آتش دی ہے بہاراں نے

ہر غنچہ اخگر ہے ہم کو ہر گل ایک انگارا ہے

جب تجھ بن لگتا ہے تڑپنے جائے ہے نکلا ہاتھوں سے

ہے جو گرہ سینے میں اس کو دل کہیے یا پارہ ہے

راہ حدیث جو ٹک بھی نکلے کون سکھائے ہم کو پھر

روئے سخن پر کس کو دے وہ شوخ بڑا عیارہ ہے

کام اس کا ہے خوں افشانی ہر دم تیری فرقت میں

چشم کو میری آ کر دیکھ اب لوہو کا فوارہ ہے

بال کھلے وہ شب کو شاید بستر ناز پہ سوتا تھا

آئی نسیم صبح جو ادھر پھیلا عنبر سارا ہے

کس دن دامن کھینچ کے ان نے یار سے اپنا کام لیا

مدت گزری دیکھتے ہم کو میرؔ بھی اک ناکارہ ہے

ghair ne ham ko zabh kiya ne taqat hai ne yara hai

is kutte ne kar ke dileri said-e-haram ko mara hai

bagh ko tujh bin apne bhaen atish di hai baharan ne

har ghuncha akhgar hai ham ko har gul ek angara hai

jab tujh bin lagta hai tarapne jae hai nikla hathon se

hai jo girah sine mein us ko dil kahiye ya para hai

rah hadis jo tuk bhi nikle kaun sikhae ham ko phir

ru-e-sukhan par kis ko de wo shokh bara ayara hai

kam us ka hai khun afshani har dam teri furqat mein

chashm ko meri a kar dekh ab lohu ka fawwara hai

bal khule wo shab ko shayad bistar naz pe sota tha

ai nasim-e-subh jo idhar phaila ambar sara hai

kis din daman khinch ke un ne yar se apna kam liya

muddat guzri dekhte ham ko mir bhi ik nakara hai