غمگیں نہیں ہوں دہر میں تو شاد بھی نہیں

غمگیں نہیں ہوں دہر میں تو شاد بھی نہیں

آباد اگر نہیں ہوں تو برباد بھی نہیں

ملتی تری وفا کی مجھے داد بھی نہیں

مجنوں نہیں ہے دہر میں فرہاد بھی نہیں

کہتا ہے یار جرم کی پاتے ہو تم سزا

انصاف اگر نہیں ہے تو بیداد بھی نہیں

انساں کی قدر کیا ہے جو ہو تیرے روبرو

تیرے مقابلے میں پری زاد بھی نہیں

افسوس کس سے یار کی کھنچوائیے شبیہ

مانیؔ نہیں جہاں میں ہے بہزادؔ بھی نہیں

کرتا ہے عذر جور و جفا یار تو عبث

ہونا جو تھا ہوا وہ ہمیں یاد بھی نہیں

کشتہ ہوا ہوں ابروئے خم دار یار کا

میرے لیے ضرورت جلاد بھی نہیں

حسرت بھرے ہوئے گئے دنیا سے سیکڑوں

تصدیق کس سے کیجئے شداد بھی نہیں

بہرامؔ میرے زور طبیعت سے ہے سخن

شاگرد میں نہیں ہوں تو استاد بھی نہیں

ghamgin nahin hun dahr mein to shad bhi nahin

abad agar nahin hun to barbad bhi nahin

milti tiri wafa ki mujhe dad bhi nahin

majnun nahin hai dahr mein farhad bhi nahin

kahta hai yar jurm ki pate ho tum saza

insaf agar nahin hai to bedad bhi nahin

insan ki qadr kya hai jo ho tere rubaru

tere muqable mein pari zad bhi nahin

afsos kis se yar ki khinchwaiye shabih

mani nahin jahan mein hai behzad bhi nahin

karta hai uzr-e-jaur-o-jafa yar to abas

hona jo tha hua wo hamen yad bhi nahin

kushta hua hun abru-e-kham dar yar ka

mere liye zarurat-e-jallad bhi nahin

hasrat bhare hue gae duniya se saikron

tasdiq kis se kijiye shaddad bhi nahin

bahram mere zor tabiat se hai sukhan

shagird mein nahin hun to ustad bhi nahin