بجھے بجھے سے شرارے مجھے قبول نہیں

بجھے بجھے سے شرارے مجھے قبول نہیں

سواد شب میں ستارے مجھے قبول نہیں

یہ کوہ و دشت بھی آئینۂ بہار بنے

فقط چمن کے نظارے مجھے قبول نہیں

تمہارے ذوق کرم پر بہت ہوں شرمندہ

مراد یہ ہے سہارے مجھے قبول نہیں

مثال موج سمندر کی سمت لوٹ چلو

سکوں بہ دوش کنارے مجھے قبول نہیں

میں اپنے خوں سے جلاؤں گا رہ گزر کے چراغ

یہ کہکشاں یہ ستارے مجھے قبول نہیں

شکیبؔ جس کو شکایت ہے کھل کے بات کرے

ڈھکے چھپے سے اشارے مجھے قبول نہیں

bujhe bujhe se sharare mujhe qubul nahin

sawad-e-shab mein sitare mujhe qubul nahin

ye koh-o-dasht bhi aina-e-bahar bane

faqat chaman ke nazare mujhe qubul nahin

tumhare zauq-e-karam par bahut hun sharminda

murad ye hai sahare mujhe qubul nahin

misal-e-mauj samundar ki samt laut chalo

sukun ba dosh kinare mujhe qubul nahin

main apne khun se jalaunga rah guzar ke charagh

ye kahkashan ye sitare mujhe qubul nahin

shakeb jis ko shikayat hai khul ke bat kare

dhake chhupe se ishare mujhe qubul nahin