غیر الفت کا راز کیا جانے

غیر الفت کا راز کیا جانے

لطف ناز و نیاز کیا جانے

نیم جانوں پہ کیا گزرتی ہے

نرگس نیم باز کیا جانے

میرے طول شب جدائی کو

تیری زلف دراز کیا جانے

پاک بازان مے کدہ کا مقام

جو نہ ہو پاک باز کیا جانے

دل ہے اس پردہ میں کوئی ورنہ

شمع سوز و گداز کیا جانے

ہم جو مستی میں گرتے پڑتے ہیں

زاہد ایسی نماز کیا جانے

راہ الفت نہ جس نے طے کی ہو

وہ نشیب و فراز کیا جانے

جس کے دل میں نہ سوز ہو وہ جلیلؔ

کیف آواز ساز کیا جانے

ghair ulfat ka raz kya jane

lutf-e-naz-o-niyaz kya jane

nim janon pe kya guzarti hai

nargis-e-nim baz kya jane

mere tul-e-shab-e-judai ko

teri zulf-e-daraz kya jane

pak bazan-e-mai kada ka maqam

jo na ho pak baz kya jane

dil hai is parda mein koi warna

shama soz-o-gudaz kya jane

ham jo masti mein girte parte hain

zahid aisi namaz kya jane

rah-e-ulfat na jis ne tai ki ho

wo nasheb-o-faraz kya jane

jis ke dil mein na soz ho wo jalil

kaif-e-awaz-e-saz kya jane