غیروں پہ کھل نہ جائے کہیں راز دیکھنا

غیروں پہ کھل نہ جائے کہیں راز دیکھنا

میری طرف بھی غمزۂ غماز دیکھنا

اڑتے ہی رنگ رخ مرا نظروں سے تھا نہاں

اس مرغ پر شکستہ کی پرواز دیکھنا

دشنام یار طبع حزیں پر گراں نہیں

اے ہم نفس نزاکت آواز دیکھنا

دیکھ اپنا حال زار منجم ہوا رقیب

تھا سازگار طالع ناساز دیکھنا

بد کام کا مآل برا ہے جزا کے دن

حال سپہر تفرقہ انداز دیکھنا

مت رکھیو گرد تارک عشاق پر قدم

پامال ہو نہ جائے سرافراز دیکھنا

میری نگاہ خیرہ دکھاتے ہیں غیر کو

بے طاقتی پہ سرزنش ناز دیکھنا

ترک صنم بھی کم نہیں سوز جحیم سے

مومنؔ غم مآل کا آغاز دیکھنا

ghairon pe khul na jae kahin raz dekhna

meri taraf bhi ghamza-e-ghammaz dekhna

urte hi rang-e-rukh mira nazron se tha nihan

is murgh par shikasta ki parwaz dekhna

dushnam yar tab-e-hazin par giran nahin

ai ham nafas nazakat-e-awaz dekhna

dekh apna hal-e-zar munajjam hua raqib

tha sazgar tale-e-nasaz dekhna

bad kam ka maal bura hai jaza ke din

hal-e-sipehr-e-tafriqa andaz dekhna

mat rakhiyo gard tarak-e-ushshaq par qadam

pamal ho na jae sarafraz dekhna

meri nigah-e-khira dikhate hain ghair ko

be taqati pe sarzanish-e-naz dekhna

tark-e-sanam bhi kam nahin soz-e-jahim se

momin gham-e-maal ka aghaz dekhna