غم دنیا نہیں پھر کون سا غم ہے ہم کو

غم دنیا نہیں پھر کون سا غم ہے ہم کو

فکر و اندیشۂ عقبیٰ سے بھی رم ہے ہم کو

دہن غنچہ سے پیغام وفا سنتے ہیں

غازۂ عارض صد ہست عدم ہے ہم کو

قول یہ سچ ہے کہ خود کردہ کا درماں کیا ہے

داور حشر پہ ناحق کا بھرم ہے ہم کو

اگلے لقموں میں نہیں قند مکرر کا مزا

سخت بے لطف حیات پیہم ہے ہم کو

زیست کی کشمکش اور مرگ کی قربت کا الم

آمد و رفت نفس تیغ دو دم ہے ہم کو

بیٹھے بیٹھے جو کٹے پھر تگ و دو سے حاصل

ہر نفس جادۂ ہستی میں قدم ہے ہم کو

ذرہ ذرہ میں نظر آتی ہے تصویر صنم

سر بسر رو کش صد دیر و حرم ہے ہم کو

بار غم بار سے احساں کے بدل جاتا ہے

طوق گردن کشش کاف کرم ہے ہم کو

حال دل لکھتے نہ لوگوں کی زباں میں پڑتے

وجہ انگشت نمائی یہ قلم ہے ہم کو

آنکھ کیا ڈالیے اس گل پہ جو کمھلا جائے

کیفیؔ اپنا ہی یہ دل باغ ارم ہے ہم کو

gham-e-duniya nahin phir kaun sa gham hai ham ko

fikr-o-andesha-e-uqba se bhi ram hai ham ko

dahan-e-ghuncha se paigham-e-wafa sunte hain

ghaza-e-ariz-e-sad hast-e-adam hai ham ko

qaul ye sach hai ke khud karda ka darman kya hai

dawar-e-hashr pe nahaq ka bharam hai ham ko

agle luqmaun mein nahin qand-e-mukarrar ka maza

sakht be lutf hayat paiham hai ham ko

zist ki kashmakash aur marg ki qurbat ka alam

amad-o-raft-e-nafas tegh-e-do dam hai ham ko

baithe baithe jo kate phir tag-o-do se hasil

har nafas jada-e-hasti mein qadam hai ham ko

zarra zarra mein nazar ati hai taswir sanam

sar basar ro kash-e-sad dair-o-haram hai ham ko

bar-e-gham bar se ehsan ke badal jata hai

tauq-e-gardan kashish-e-kaf-e-karam hai ham ko

hal-e-dil likhte na logon ki zaban mein parte

wajh-e-angusht numai ye qalam hai ham ko

ankh kya daliye us gul pe jo kamhla jae

kaifi apna hi ye dil bagh-e-iram hai ham ko