غلط ہے دل پہ قبضہ کیا کرے گی بے خودی میری

غلط ہے دل پہ قبضہ کیا کرے گی بے خودی میری

یہ جنس مشترک ہے جو کبھی ان کی کبھی میری

حجاب اٹھتے چلے جاتے ہیں اور میں بڑھتا جاتا ہوں

کہاں تک مجھ کو لے جاتی ہے دیکھوں بے خودی میری

توہم تھا مجھے نقش دوئی کس طرح مٹتا ہے

نقاب رخ الٹ کر اس نے صورت کھینچ دی میری

ادھر بھی اڑ کے آ خاکستر دل منتظر میں ہوں

لگا لوں تجھ کو آنکھوں سے تو ہی ہے زندگی میری

عزیزؔ اک دن مجھے یہ رازداری ختم کر دے گی

کسی نے بات ادھر کی اور رنگت اڑ گئی میری

ghalat hai dil pe qabza kya karegi be khudi meri

ye jins-e-mushtarak hai jo kabhi un ki kabhi meri

hijab uthte chale jate hain aur main barhta jata hun

kahan tak mujh ko le jati hai dekhun be khudi meri

tawahhum tha mujhe naqsh-e-dui kis tarah mitta hai

naqab-e-rukh ulat kar us ne surat khinch di meri

idhar bhi ur ke a khakistar-e-dil muntazir mein hun

laga lun tujh ko ankhon se tu hi hai zindagi meri

aziz ik din mujhe ye razdari khatm kar degi

kisi ne bat idhar ki aur rangat ur gai meri