غم دل کا بیان چھوڑ گئے

غم دل کا بیان چھوڑ گئے

ہم یہ اپنا نشان چھوڑ گئے

تری دہشت سے باغ میں صیاد

مرغ سب آشیان چھوڑ گئے

راہ میں مجھ کو ہمرہاں میرے

جان کو ناتوان چھوڑ گئے

نفرت آئی سگ و ہما کو کیا

جو مرے استخوان چھوڑ گئے

چلتے چلتے بھی یہ جفا کیشاں

ہاتھ مجھ پر ندان چھوڑ گئے

کسی در پر انہوں کو جا نہ ملی

جو ترا آستان چھوڑ گئے

سفر اس دل سے کر گئے غم و درد

یار سونا مکان چھوڑ گئے

صفحۂ روزگار پر لکھ لکھ

عشق کی داستان چھوڑ گئے

لے گئے سب بدن زمیں میں ہم

مصحفیؔ اک زبان چھوڑ گئے

gham-e-dil ka bayan chhor gae

ham ye apna nishan chhor gae

tiri dahshat se bagh mein sayyad

murgh sab ashiin chhor gae

rah mein mujh ko hamrahan mere

jan ko natawan chhor gae

nafrat ai sag-o-huma ko kiya

jo mire ustukhawan chhor gae

chalte chalte bhi ye jafa keshan

hath mujh par nidan chhor gae

kisi dar par unhon ko ja na mili

jo tira astan chhor gae

safar is dil se kar gae gham-o-dard

yar sona makan chhor gae

safha-e-rozgar par likh likh

ishq ki dastan chhor gae

le gae sab badan zamin mein ham

mushafi ik zaban chhor gae