غم کو باہم بہم نہ کیجے

غم کو باہم بہم نہ کیجے

گر غم ہے تو غم کا غم نہ کیجے

یک نیم نگہ ہے سو بھی کاری

کچھ اس میں سے تو کم نہ کیجے

گو ہم ہیں عاشق وفادار

پر اتنا بھی ستم نہ کیجے

بے فائدہ روئیے کہاں تک

اب جی میں ہے چشم نم نہ کیجے

غیروں کے پڑھانے کو میرا وصف

اس طور سے یہ کرم نہ کیجے

گو تیغ اصیل ہیں یہ ابرو

ہر دم اتنا بھی خم نہ کیجے

گر جام مے اثرؔ لگے ہاتھ

پھر خواہش جام جم نہ کیجے

gham ko baham baham na kije

gar gham hai to gham ka gham na kije

yak nim nigah hai so bhi kari

kuchh is mein se to kam na kije

go ham hain ashiq-e-wafadar

par itna bhi sitam na kije

be faida roiye kahan tak

ab ji mein hai chashm-e-nam na kije

ghairon ke parhane ko mera wasf

is taur se ye karam na kije

go tegh-e-asil hain ye abru

har dam itna bhi kham na kije

gar jam-e-mai asar lage hath

phir khwahish-e-jam-e-jam na kije