غلط ہے عشق میں اے بوالہوس اندیشہ راحت کا

غلط ہے عشق میں اے بوالہوس اندیشہ راحت کا

رواج اس ملک میں ہے درد و داغ و رنج و کلفت کا

زمیں اک صفحۂ تصویر بیہوشاں سے مانا ہے

یہ مجلس جب سے ہے اچھا نہیں کچھ رنگ صحبت کا

جہاں جلوے سے اس محبوب کے یکسر لبالب ہے

نظر پیدا کر اول پھر تماشا دیکھ قدرت کا

ہنوز آوارۂ لیلیٰ ہے جان رفتہ مجنوں کی

موئے پر بھی رہا ہوتا نہیں وابستہ الفت کا

حریف بے جگر ہے صبر ورنہ کل کی صحبت میں

نیاز و ناز کا جھگڑا گرو تھا ایک جرأت کا

نگاہ یاس بھی اس صید افگن پر غنیمت ہے

نہایت تنگ ہے اے صید بسمل وقت فرصت کا

خرابی دل کی اس حد ہے کہ یہ سمجھا نہیں جاتا

کہ آبادی بھی یاں تھی یا کہ ویرانہ تھا مدت کا

نگاہ مست نے اس کی لٹائی خانقہ ساری

پڑا ہے برہم اب تک کارخانہ زہد و طاعت کا

قدم ٹک دیکھ کر رکھ میرؔ سر دل سے نکالے گا

پلک سے شوخ تر کانٹا ہے صحرائے محبت کا

ghalat hai ishq mein ai bawalhos andesha rahat ka

riwaj is mulk mein hai dard-o-dagh-o-ranj-o-kulfat ka

zamin ik safha-e-taswir behoshan se mana hai

ye majlis jab se hai achchha nahin kuchh rang-e-sohbat ka

jahan jalwe se is mahbub ke yaksar labalab hai

nazar paida kar awwal phir tamasha dekh qudrat ka

hanoz awara-e-laila hai jan-e-rafta majnun ki

maue par bhi raha hota nahin wabasta ulfat ka

harif-e-be jigar hai sabr warna kal ki sohbat mein

niyaz-o-naz ka jhagra giro tha ek jurat ka

nigah-e-yas bhi is said afgan par ghanimat hai

nihayat tang hai ai said-e-bismil waqt-e-fursat ka

kharabi dil ki is had hai ke ye samjha nahin jata

ke abadi bhi yan thi ya ke wirana tha muddat ka

nigah-e-mast ne us ki lutai khanqa sari

para hai barham ab tak karkhana zohd-o-taat ka

qadam tuk dekh kar rakh mir sar dil se nikalega

palak se shokh tar kanta hai sahra-e-mohabbat ka