بخت کو رویا کئے اور آشیاں دیکھا کئے

بخت کو رویا کئے اور آشیاں دیکھا کئے

بجلیاں گرتی رہیں ہم بے زباں دیکھا کئے

التفات یار شکل دشمناں دیکھا کئے

رات بھر محفل میں سوئے آسماں دیکھا کئے

کر دیا صیاد نے قید قفس تو کیا ہوا

ہم اسیری میں بھی خواب گلستاں دیکھا کئے

پتے پتے سے خزاں نے کھینچ لی جان بہار

گلستاں لٹتا رہا اور باغباں دیکھا کئے

غیر اس کی بزم میں آتے رہے جاتے رہے

ہم بڑی حسرت سے روئے پاسباں دیکھا کئے

رفتہ رفتہ جان بھی نذر الم کرنی پڑی

ہر مسرت جب نصیب دشمناں دیکھا کئے

مٹنے والوں کے لئے اسباب کی حاجت نہیں

کیا کہیں ہم کیوں کسی کا آستاں دیکھا کئے

بخت نے کب ایک حالت پر ہمیں رہنے دیا

عمر بھر ہم انقلابات جہاں دیکھا کئے

ان کی آنکھوں ان کے دل کو آفریں صد آفریں

دوست بن کر جو مری بربادیاں دیکھا کئے

وجہ کچھ ہو ہم نے جب سے آنکھ کھولی ہے منیرؔ

روز و شب بربادیٔ ہندوستاں دیکھا کئے

bakht ko roya kiye aur ashiyan dekha kiye

bijliyan girti rahen ham be zaban dekha kiye

iltifat-e-yar shakl-e-dushmanan dekha kiye

rat bhar mahfil mein su-e-asman dekha kiye

kar diya sayyad ne qaid-e-qafas to kya hua

ham asiri mein bhi khwab-e-gulsitan dekha kiye

patte patte se khizan ne khinch li jan-e-bahar

gulsitan lutta raha aur baghban dekha kiye

ghair us ki bazm mein ate rahe jate rahe

ham bari hasrat se ru-e-pasban dekha kiye

rafta rafta jan bhi nazr-e-alam karni pari

har masarrat jab nasib-e-dushmanan dekha kiye

mitne walon ke liye asbab ki hajat nahin

kya kahen ham kyun kisi ka astan dekha kiye

bakht ne kab ek halat par hamen rahne diya

umr bhar ham inqilabat jahan dekha kiye

un ki ankhon un ke dil ko afrin sad afrin

dost ban kar jo miri barbadiyan dekha kiye

wajh kuchh ho ham ne jab se ankh kholi hai munir

roz-o-shab barbadi-e-hindostan dekha kiye