غبار خاطر ناشاد ہوں میں

غبار خاطر ناشاد ہوں میں

کہ مٹنے کے لئے آباد ہوں میں

جفا و جور سے بھی شاد ہوں میں

حریص لذت بیداد ہوں میں

لب معجز نما سے زندگی ہے

خراج ناز سے برباد ہوں میں

بڑی مشکل میں کی امداد میری

فدائے بازوئے جلاد ہوں میں

نہ کر پامال گردش ہائے افلاک

کسی بھولے ہوئے کی یاد ہوں میں

تمنا وصل کی تو اور شے ہے

تمہارے ہجر سے بھی شاد ہوں میں

تمہارے ناوک مژگاں کے ہوتے

رہین نشتر فصاد ہوں میں

مجھی پر آنکھ رہتی ہے عدو کی

فروغؔ اب دیدۂ حساد ہوں میں

ghubar-e-khatir-e-nashad hun main

ke mitne ke liye abad hun main

jafa-o-jaur se bhi shad hun main

haris-e-lazzat-e-bedad hun main

lab-e-mojiz numa se zindagi hai

khiraj-e-naz se barbad hun main

bari mushkil mein ki imdad meri

fida-e-bazu-e-jallad hun main

na kar pamal-e-gardish ha-e-aflak

kisi bhule hue ki yad hun main

tamanna wasl ki to aur shai hai

tumhare hijr se bhi shad hun main

tumhare nawak-e-mizhgan ke hote

rahin-e-nashtar-e-fassad hun main

mujhi par ankh rahti hai adu ki

farogh ab dida-e-hisad hun main