بجھ گئی شمع حرم باب کلیسا نہ کھلا

بجھ گئی شمع حرم باب کلیسا نہ کھلا

کھل گئے زخم کے لب تیرا دریچہ نہ کھلا

در توبہ سے بگولوں کی طرح گزرے لوگ

ابر کی طرح امڈ آئے جو مے خانہ کھلا

شہر در شہر پھری مری گناہوں کی بیاض

بعض نظروں پہ مرا سوز حکیمانہ کھلا

نازنینوں میں رسائی کا یہ عالم تھا کبھی

لاکھ پہروں میں بھی دروازے پہ دروازہ کھلا

ہم پری زادوں میں کھیلے شب افسوں میں پلے

ہم سے بھی تیرے طلسمات کا عقدہ نہ کھلا

ایک اک شکل کو دیکھا ہے بڑی حسرت سے

اجنبی کون ہے اور کون شناسا نہ کھلا

ریت پر پھینک گئی عقل کی گستاخ لبی

پھر کبھی کشف و کرامات کا دریا نہ کھلا

bujh gai sham-e-haram bab-e-kalisa na khula

khul gae zakhm ke lab tera daricha na khula

dar-e-tauba se bagulon ki tarah guzre log

abr ki tarah umad ae jo mai khana khula

shahr dar shahr phiri miri gunahon ki bayaz

baaz nazron pe mira soz-e-hakimana khula

nazninon mein rasai ka ye alam tha kabhi

lakh pahron mein bhi darwaze pe darwaza khula

ham pari zadon mein khele shab-e-afsun mein pale

ham se bhi tere tilismat ka uqda na khula

ek ik shakl ko dekha hai bari hasrat se

ajnabi kaun hai aur kaun shanasa na khula

ret par phenk gai aql ki gustakh labi

phir kabhi kashf-o-karamat ka dariya na khula