غش بھی آیا مری پرسش کو قضا بھی آئی

غش بھی آیا مری پرسش کو قضا بھی آئی

بے مروت تجھے کچھ شرم و حیا بھی آئی

موسم حسن تو تھا فصل جفا بھی آئی

ساتھ ہی ساتھ جوانی کی ادا بھی آئی

دم کا آنکھوں میں اٹکنا بھی مبارک نہ ہوا

وقت کی بات تم آئے تو قضا بھی آئی

میں شب وصل یہ سمجھا کہ سحر بھی کچھ ہے

وہ جو آئے تو موذن کی صدا بھی آئی

ان مریضوں کی عیادت کو وہ اب نکلے ہیں

موت جا کر جنہیں مٹی میں ملا بھی آئی

کر دیا سوز دروں نے مجھے شمع سر بزم

بن گئی دم پہ اگر پاس ہوا بھی آئی

کان یوں ان کے بھرے ہیں مری فریادوں نے

نالے سمجھے جو کوئی اور صدا بھی آئی

پھر بھی ثاقبؔ نہ اڑی طالع خفتہ کی نیند

آہ جا کر مری گردوں کو ہلا بھی آئی

ghash bhi aya miri pursish ko qaza bhi ai

be murawwat tujhe kuchh sharm-o-haya bhi ai

mausam-e-husn to tha fasl-e-jafa bhi ai

sath hi sath jawani ki ada bhi ai

dam ka ankhon mein atakna bhi mubarak na hua

waqt ki bat tum ae to qaza bhi ai

main shab-e-wasl ye samjha ke sahar bhi kuchh hai

wo jo ae to muazzin ki sada bhi ai

in marizon ki ayadat ko wo ab nikle hain

maut ja kar jinhen mitti mein mila bhi ai

kar diya soz-e-darun ne mujhe sham-e-sar bazm

ban gai dam pe agar pas hua bhi ai

kan yun un ke bhare hain miri fariyadon ne

nale samjhe jo koi aur sada bhi ai

phir bhi saqib na uri tale-e-khufta ki nind

ah ja kar miri gardun ko hila bhi ai