غرق نہ کر دکھلا کر دل کو کان کا بالا زلف کا حلقہ

غرق نہ کر دکھلا کر دل کو کان کا بالا زلف کا حلقہ

بحر حسن کے ہیں یہ بھنور دو کان کا بالا زلف کا حلقہ

ہالۂ مہ پہنچے ہے نہ اس کو نے خط ساغر اس کو لگے ہے

آئینہ تم لے کر دیکھو کان کا بالا زلف کا حلقہ

آہوئے دل اور طائر جاں کے حق میں یہ دونوں پھندے ہیں

ہم کو دکھا کر تم نہ چھپاؤ کان کا بالا زلف کا حلقہ

آج سوائے شانے کے یاں کس کا منہ ہے کون ہے ایسا

چھوڑے تمہارے چہرے پر جو کان کا بالا زلف کا حلقہ

دونوں تیرے عارض پر دن رات ملے یہ رہتے ہیں

عینک مہر و ماہ نہ کیوں ہو کان کا بالا زلف کا حلقہ

طیش زنی میں یہ عقرب ہے کالا ہے وہ کنڈلی مارے

حضرت دل باز آؤ نہ چھیڑو کان کا بالا زلف کا حلقہ

کس کو حصار حسن کہوں میں کس کو خط پرکار کہے دل

منہ سے الٹ برقع کو دکھا دو کان کا بالا زلف کا حلقہ

یہ ترے رخ کے بوسے لیں اور ترسیں مری آنکھیں اے وائے

دیکھ کے کیوں رشک آئے نہ مجھ کو کان کا بالا زلف کا حلقہ

آج زلیخا گر یہاں ہوتی دام کمند و چاہ میں پھنستی

دیکھ مرے یوسف کا عزیزو کان کا بالا زلف کا حلقہ

کیونکہ نصیرؔ ارباب سخن تحسیں نہ کریں سن کر یہ غزل

جبکہ تم اس صورت سے باندھو کان کا بالا زلف کا حلقہ

gharq na kar dikhla kar dil ko kan ka bala zulf ka halqa

bahr husn ke hain ye bhanwar do kan ka bala zulf ka halqa

hala-e-mah pahunche hai na us ko ne khat saghar us ko lage hai

aina tum le kar dekho kan ka bala zulf ka halqa

ahu-e-dil aur tair jan ke haq mein ye donon phande hain

ham ko dikha kar tum na chhupao kan ka bala zulf ka halqa

aj siwae shane ke yan kis ka munh hai kaun hai aisa

chhore tumhare chehre par jo kan ka bala zulf ka halqa

donon tere ariz par din rat mile ye rahte hain

ainak mehr-o-mah na kyun ho kan ka bala zulf ka halqa

taish zani mein ye aqrab hai kala hai wo kundli mare

hazrat dil baz ao na chhero kan ka bala zulf ka halqa

kis ko hisar-e-husn kahon main kis ko khat parkar kahe dil

munh se ulat burqaa ko dikha do kan ka bala zulf ka halqa

ye tire rukh ke bose len aur tarsen miri ankhen ai wae

dekh ke kyun rashk ae na mujh ko kan ka bala zulf ka halqa

aj zulekha gar yahan hoti dam kamand-o-chah mein phansti

dekh mire yusuf ka azizo kan ka bala zulf ka halqa

kyunke nasir arbab-e-sukhan tahsin na karen sun kar ye ghazal

jabke tum is surat se bandho kan ka bala zulf ka halqa