عشق کے غم گسار ہیں ہم لوگ

عشق کے غم گسار ہیں ہم لوگ

حسن کے رازدار ہیں ہم لوگ

دست قدرت کو ناز ہے ہم پر

وقت کے شاہکار ہیں ہم لوگ

ہم سے قائم ہے گلستاں کا بھرم

آبروئے بہار ہیں ہم لوگ

منزلیں ہیں ہمارے قدموں میں

حاصل رہ گزار ہیں ہم لوگ

ہم سے تنظیم ہے زمانے کی

محور روزگار ہیں ہم لوگ

ہم جو چاہیں گے اب وہی ہوگا

صاحب اختیار ہیں ہم لوگ

ہم سے روشن ہے کائنات شکیبؔ

اصل لیل و نہار ہیں ہم لوگ

ishq ke gham gusar hain ham log

husn ke razdar hain ham log

dast-e-qudrat ko naz hai ham par

waqt ke shahkar hain ham log

ham se qaim hai gulsitan ka bharam

abru-e-bahar hain ham log

manzilen hain hamare qadmon mein

hasil-e-rah guzar hain ham log

ham se tanzim hai zamane ki

mehwar-e-rozgar hain ham log

ham jo chahenge ab wahi hoga

sahab-e-ikhtiyar hain ham log

ham se raushan hai kainat shakeb

asl-e-lail-o-nahar hain ham log