عشق کرتے ہیں تو اہل عشق یوں سودا کریں

عشق کرتے ہیں تو اہل عشق یوں سودا کریں

ہوش کا سرمایہ نذر حسن بے پروا کریں

ہم نہ ہوں لیکن زمانے میں ہمارا نام ہو

ایسی ہستی چاہیئے تو مر کے ہم پیدا کریں

ہے خود آرائی کسی کی شان خودداری کے ساتھ

یعنی ان کو ہم نہ دیکھیں وہ ہمیں دیکھا کریں

درس عرفاں کے لیے ہر ذرہ ہے طور کلیم

دیکھنے والے مگر پہلے نظر پیدا کریں

شیخ کو جنت مبارک، ہم کو دوزخ ہے قبول

فکر عقبیٰ وہ کریں، ہم خدمت دنیا کریں

ایک دل ہے ایک حسرت ایک ہم ہیں ایک تم

اتنے غم کم ہیں جو کوئی اور غم پیدا کریں

احسنؔ رنجور کو دنیا سے کیا ہے واسطہ

آپ نے بیمار ڈالا آپ ہی اچھا کریں

ishq karte hain to ahl-e-ishq yun sauda karen

hosh ka sarmaya nazr-e-husn-e-be parwa karen

ham na hun lekin zamane mein hamara nam ho

aisi hasti chahiye to mar ke ham paida karen

hai khud arai kisi ki shan-e-khuddari ke sath

yaani un ko ham na dekhen wo hamen dekha karen

dars-e-irfan ke liye har zarra hai tur-e-kalim

dekhne wale magar pahle nazar paida karen

shaikh ko jannat mubarak, ham ko dozakh hai qubul

fikr-e-uqba wo karen, ham khidmat-e-duniya karen

ek dil hai ek hasrat ek ham hain ek tum

itne gham kam hain jo koi aur gham paida karen

ahsan-e-ranjur ko duniya se kya hai wasta

ap ne bimar dala ap hi achchha karen