عشق کیا کیا آفتیں لاتا رہا

عشق کیا کیا آفتیں لاتا رہا

آخر اب دوری میں جی جاتا رہا

مہر و مہ گل پھول سب تھے پر ہمیں

چہرئی چہرہ ہی وہ بھاتا رہا

دل ہوا کب عشق کی رہ کا دلیل

میں تو خود گم ہی اسے پاتا رہا

منہ دکھاتا برسوں وہ خوش رو نہیں

چاہ کا یوں کب تلک ناتا رہا

کچھ نہ میں سمجھا جنون و عشق میں

دیر ناصح مجھ کو سمجھاتا رہا

داغ تھا جو سر پہ میرے شمع ساں

پاؤں تک مجھ کو وہی کھاتا رہا

کیسے کیسے رک گئے ہیں میرؔ ہم

مدتوں منہ تک جگر آتا رہا

ishq kya kya afaten lata raha

akhir ab duri mein ji jata raha

mehr-o-mah gul phul sab the par hamen

chahri chehra hi wo bhata raha

dil hua kab ishq ki rah ka dalil

main to khud gum hi use pata raha

munh dikhata barson wo khush ro nahin

chah ka yun kab talak nata raha

kuchh na main samjha junun-o-ishq mein

der naseh mujh ko samjhata raha

dagh tha jo sar pe mere shama san

paon tak mujh ko wahi khata raha

kaise kaise ruk gae hain mir ham

muddaton munh tak jigar ata raha