عشق کی چوسر کس نے کھیلی یہ تو کھیل ہمارے ہیں

عشق کی چوسر کس نے کھیلی یہ تو کھیل ہمارے ہیں

دل کی بازی مات ہوئی تو جان کی بازی ہارے ہیں

کیسے کیسے لخت جگر ہیں کیا کیا دل کے پارے ہیں

ایسے لعل کہاں دنیا میں جیسے لعل ہمارے ہیں

اس کو مارا اس کو مارا یہ بسمل وہ ٹوٹ گیا

نوک پلک والوں سے ڈریے قاتل ان کے اشارے ہیں

چھلنی چھلنی دل بھی جگر بھی روزن روزن سینہ بھی

ایک نگاہ ناز نے تیری تیر ہزاروں مارے ہیں

پھونک رہا ہے سوز نہانی کون اس آگ پہ ڈالے پانی

دل کی لگی نے آگ لگا دی داغ نہیں انگارے ہیں

لالہ رخوں میں عمر گزاری دیکھی ان کی فصل بہار

آج بھی گل سے گالوں والے مجھ کو مبارکؔ پیارے ہیں

ishq ki chausar kis ne kheli ye to khel hamare hain

dil ki bazi mat hui to jan ki bazi hare hain

kaise kaise lakht-e-jigar hain kya kya dil ke pare hain

aise laal kahan duniya mein jaise laal hamare hain

us ko mara us ko mara ye bismil wo tut gaya

nok palak walon se dariye qatil un ke ishare hain

chhalni chhalni dil bhi jigar bhi rauzan rauzan sina bhi

ek nigah-e-naz ne teri tir hazaron mare hain

phunk raha hai soz-e-nihani kaun is ag pe dale pani

dil ki lagi ne ag laga di dagh nahin angare hain

lala rukhon mein umr guzari dekhi un ki fasl-e-bahar

aj bhi gul se galon wale mujh ko mubarak pyare hain