عشق کو ترک جنوں سے کیا غرض

عشق کو ترک جنوں سے کیا غرض

چرخ گرداں کو سکوں سے کیا غرض

دل میں ہے اے خضر گر صدق طلب

راہرو کو رہنموں سے کیا غرض

حاجیو ہے ہم کو گھر والے سے کام

گھر کے محراب و ستوں سے کیا غرض

گنگنا کر آپ رو پڑتے ہیں جو

ان کو چنگ و ارغنوں سے کیا غرض

نیک کہنا نیک جس کو دیکھنا

ہم کو تفتیش دروں سے کیا غرض

دوست ہیں جب زخم دل سے بے خبر

ان کو اپنے اشک خوں سے کیا غرض

عشق سے ہے مجتنب زاہد عبث

شیر کو صید زبوں سے کیا غرض

کر چکا جب شیخ تسخیر قلوب

اب اسے دنیائے دوں سے کیا غرض

آئے ہو حالیؔ پئے تسلیم یاں

آپ کو چون و چگوں سے کیا غرض

ishq ko tark-e-junun se kya gharaz

charkh gardan ko sakun se kya gharaz

dil mein hai ai khizr gar sidq-e-talab

rahrau ko rahnumon se kya gharaz

hajiyo hai ham ko ghar wale se kam

ghar ke mehrab-o-sutun se kya gharaz

gunguna kar ap ro parte hain jo

un ko chang-o-arghinon se kya gharaz

nek kahna nek jis ko dekhna

ham ko taftish-e-darun se kya gharaz

dost hain jab zakhm-e-dil se be khabar

un ko apne ashk-e-khun se kya gharaz

ishq se hai mujtanab zahid abas

sher ko said-e-zabun se kya gharaz

kar chuka jab shaikh taskhir-e-qulub

ab use duniyae dun se kya gharaz

ae ho hali piye taslim yan

ap ko chun-o-chugon se kya gharaz