شیخ جی آؤ مصلیٰ گرو جام کرو

شیخ جی آؤ مصلیٰ گرو جام کرو

جنس تقویٰ کے تئیں صرف مئے خام کرو

فرش مستاں کرو سجادۂ بے تہ کے تئیں

مے کی تعظیم کرو شیشے کا اکرام کرو

دامن پاک کو آلودہ رکھو بادے سے

آپ کو مغبچوں کے قابل دشنام کرو

نیک نامی و تقاوت کو دعا جلد کہو

دین و دل پیش کش سادۂ خود کام کرو

ننگ و ناموس سے اب گزرو جوانوں کی طرح

پر فشانی کرو اور ساقی سے ابرام کرو

خوب اگر جرعہ مے نوش نہیں کر سکتے

خاطر جمع مے آشام سے یہ کام کرو

اٹھ کھڑے ہو جو جھکے گردن مینائے شراب

خدمت بادہ گساراں ہی سرانجام کرو

مطرب آ کر جو کرے چنگ نوازی تو تم

پیرہن مستوں کی تقلید سے انعام کرو

خنکی اتنی بھی تو لازم نہیں اس موسم میں

پاس جوش گل و دل گرمی ایام کرو

سایۂ گل میں لب جو پہ گلابی رکھو

ہاتھ میں جام کو لو آپ کو بدنام کرو

آہ تا چند رہو خانقہ و مسجد میں

ایک تو صبح گلستاں میں بھی شام کرو

رات تو ساری گئی سنتے پریشاں گوئی

میرؔ جی کوئی گھڑی تم بھی تو آرام کرو

shaikh ji ao musalli giro jam karo

jins-e-taqwa ke tain sirf-e-mai-e-kham karo

farsh-e-mustan karo sajjada-e-be tah ke tain

mai ki taazim karo shishe ka ikram karo

daman-e-pak ko aluda rakho bade se

ap ko mughbachon ke qabil-e-dushnam karo

nek nami-o-taqawat ko dua jald kaho

din-o-dil pesh kash-e-sada-e-khud kam karo

nang-o-namus se ab guzro jawanon ki tarah

par fishani karo aur saqi se ibram karo

khub agar jura mai nosh nahin kar sakte

khatir-e-jama mai asham se ye kam karo

uth khare ho jo jhuke gardan-e-mina-e-sharab

khidmat bada gusaran hi saranjam karo

mutrib a kar jo kare chang nawazi to tum

pairahan maston ki taqlid se inam karo

khunuki itni bhi to lazim nahin is mausam mein

pas josh-e-gul-o-dil garmi-e-ayyam karo

saya-e-gul mein lab jo pe gulabi rakho

hath mein jam ko lo ap ko badnam karo

ah ta chand raho khanqa-o-masjid mein

ek to subh-e-gulistan mein bhi sham karo

rat to sari gai sunte pareshan goi

mir ji koi ghari tum bhi to aram karo