Arooz is now on the App Store, for iPhone and iPad. Download →

All poetry

شہر نگار

Majaz Lakhnawi (1911–1955)

رخصت اے ہم سفرو شہر نگار آ ہی گیا

خلد بھی جس پہ ہو قرباں وہ دیار آ ہی گیا

یہ جنوں زار مرا میرے غزالوں کا جہاں

میرا نجد آ ہی گیا میرا تتار آ ہی گیا

آج پھر تا بہ چمن در پئے گلہائے چمن

گنگناتا ہوا زنبور بہار آ ہی گیا

گیسوؤں والوں میں ابرو کے کمان داروں میں

ایک صید آ ہی گیا ایک شکار آ ہی گیا

باغبانوں کو بتاؤ گل و نسریں سے کہو

اک خراب گل و نسرین بہار آ ہی گیا

خیر مقدم کو مرے کوئی بہ ہنگام سحر

اپنی آنکھوں میں لئے شب کا خمار آ ہی گیا

زلف کا ابر سیہ بازوئے سیمیں پہ لئے

پھر کوئی نغمہ زن ساز بہار آ ہی گیا

ہو گئی تشنہ لبی آج رہین کوثر

میرے لب پر لب لعلین نگار آ ہی گیا