شیفتہ ہجر میں تو نالۂ شب گیر نہ کھینچ — مصطفیٰ خان شیفتہ (Mustafa Khan Shefta)

شیفتہ ہجر میں تو نالۂ شب گیر نہ کھینچ

صبح ہونے کی نہیں خجلتِ تاثیر نہ کھینچ

اے ستم گر رگِ جاں میں ہے مری پیوستہ

دم نکل جائے گا سینے سے مرے تیر نہ کھینچ

حور پر بھی کوئی کرتا ہے عمل دنیا میں

رنجِ بے ہودہ بس اے عاملِ تسخیر نہ کھینچ

عشق سے کیا ہے تجھے شکل تری کہتی ہے

حسنِ تقریر کو آہیں دمِ تقریر نہ کھینچ

ہے یہ سامان صفائی کا عدو سے کیوں کر

دستِ مشاطہ سے یوں زلفِ گرہ گیر نہ کھینچ

اے ستم پیشہ کچھ امیدِ تلافی تو رہے

دستِ نازک سے مرے قتل کو شمشیر نہ کھینچ

چارہ گر فکر کر اس میں، کہ مقدر بدلے

ورنہ بے ہودہ اذیت پئے تدبیر نہ کھینچ

کون بے جرم ہے جو شائقِ تعزیر نہیں

شوقِ تعزیر سے تو حسرتِ تقصیر نہ کھینچ

وجد کو زمزمۂ مرغِ سحر کافی ہے

شیفتہ نازِ مغنیِ و مزامیر نہ کھینچ