شہید عشق ہوئے قیس نامور کی طرح

شہید عشق ہوئے قیس نامور کی طرح

جہاں میں عیب بھی ہم نے کیے ہنر کی طرح

کچھ آج شام سے چہرہ ہے فق سحر کی طرح

ڈھلا ہی جاتا ہوں فرقت میں دوپہر کی طرح

سیاہ بختوں کو یوں باغ سے نکال اے چرخ

کہ چار پھول تو دامن میں ہوں سپر کی طرح

تمام خلق ہے خواہان آبرو اے رب

چھپا مجھے صدف قبر میں گہر کی طرح

تجھی کو دیکھوں گا جب تک ہیں برقرار آنکھیں

مری نظر نہ پھرے گی تری نظر کی طرح

ہماری قبر پہ کیا احتیاج‌ عنبر و عود

سلگ رہا ہے ہر اک استخواں اگر کی طرح

نحیف و زار ہیں کیا زور باغباں سے چلے

جہاں بٹھا دیا بس رہ گئے شجر کی طرح

تمہارے حلقہ بہ گوشوں میں ایک ہم بھی ہیں

پڑا رہے یہ سخن کان میں گہر کی طرح

انیسؔ یوں ہوا حال جوانی و پیری

بڑھے تھے نخل کی صورت گرے ثمر کی طرح

shahid-e-ishq hue qais namwar ki tarah

jahan mein aib bhi ham ne kiye hunar ki tarah

kuchh aj sham se chehra hai faq sahar ki tarah

dhala hi jata hun furqat mein dopahar ki tarah

siyah bakhton ko yun bagh se nikal ai charkh

ke char phul to daman mein hun sipar ki tarah

tamam khalq hai khwahan abru ai rab

chhupa mujhe sadaf-e-qabr mein guhar ki tarah

tujhi ko dekhunga jab tak hain barqarar ankhen

miri nazar na phiregi tiri nazar ki tarah

hamari qabr pe kya ehtiyaj-e-ambar-o-ud

sulag raha hai har ik ustukhwan agar ki tarah

nahif-o-zar hain kya zor baghban se chale

jahan bitha diya bas rah gae shajar ki tarah

tumhare halqa ba goshon mein ek ham bhi hain

para rahe ye sukhan kan mein guhar ki tarah

unnis yun hua hal jawani-o-piri

barhe the nakhl ki surat gire samar ki tarah