عاشق سوختہ دل خط صنم دونوں ایک

عاشق سوختہ دل خط صنم دونوں ایک

جس طرح سنیے جدا شادی و غم دونوں ایک

دونوں باطن میں اگر ایک ہیں لیکن کوئی

آب و آتش نہیں رکھتا ہے بہم دونوں ایک

ہے جدا سجدہ کی جا ہندو مسلماں کی مگر

فہم والوں کے تئیں دیر و حرم دونوں ایک

کحل کرتے ہیں ہم آنکھوں میں برابر دونو

سرمۂ کور کو اور خاک قدم دونوں ایک

جب پھنسا زلف میں جا دل نہ رہا ننگ و حیا

طاق پر رکھئے وہاں ننگ و شرم دونوں ایک

بار غم ہجر پڑا سر پہ کسی کے اس دم

خاک میں دیجے ملا عقل و فہم دونوں ایک

عوض ہجر نہ لوں عیش تمام عالم کا

ہے ازل سے مجھے فرمان حکم دونوں ایک

دل میں ارماں نہ رہا باقی جو چاہا سو کیا

سیر دنیا کی بھی اور سیر عدم دونوں ایک

یار آغوش میں اپنے ہے مہیا ہر دم

بس ہے یہ میرے تئیں جاہ و حشم دونوں ایک

آرزو قاسمؔ علی دل میں نہیں کچھ لیکن

چاہئے اپنے تئیں فضل و کرم دونوں ایک

ashiq sokhta dil khat sanam donon ek

jis tarah suniye juda shadi-o-gham donon ek

donon batin mein agar ek hain lekin koi

ab-o-atish nahin rakhta hai baham donon ek

hai juda sajda ki ja hindu musalman ki magar

fahm walon ke tain dair-o-haram donon ek

kohl karte hain ham ankhon mein barabar dauno

surma-e-kor ko aur khak qadam donon ek

jab phansa zulf mein ja dil na raha nang-o-haya

taq par rakhiye wahan nang-o-sharm donon ek

bar-e-gham hijr para sar pe kisi ke is dam

khak mein dije mila aql-o-fahm donon ek

ewaz hijr na lun aish tamam alam ka

hai azal se mujhe farman hukm donon ek

dil mein arman na raha baqi jo chaha so kya

sair duniya ki bhi aur sair-e-adam donon ek

yar aghosh main apne hai mahiya har dam

bas hai ye mere tain jah-o-hasham donon ek

arzu qasim ali dil mein nahin kuchh lekin

chahiye apne tain fazl-o-karam donon ek