بجز سایہ تن لاغر کو میرے کوئی کیا سمجھے

بجز سایہ تن لاغر کو میرے کوئی کیا سمجھے

مری صورت کو محفل میں وہ نقش بوریا سمجھے

ہم اس کو اپنے حق میں آفت جاں اور بلا سمجھے

بتان بے وفا ہیں جن کو اک اپنی ادا سمجھے

کوئی کیا خاک راز مشکل ذات خدا سمجھے

اگر نور خدا کو ذات انساں سے جدا سمجھے

وہاں جا کر کرے گر قتل تو بیمار ہجراں کو

ترے کوچہ کو اپنے حق میں وہ دار الشفا سمجھے

سیہ بختی پہ سایہ گر ہو تیری زلف شب گوں کا

اسے وہ اپنے سر پہ سایۂ بال ہما سمجھے

وہی کرتا ہے انساں کام جو قسمت کراتی ہے

کوئی چاہے اسے سمجھے روا یا ناروا سمجھے

لٹکتے دیکھا سینہ پر جو تیرے تار گیسو کو

اسے دیوانے وحشت میں ترا بند قبا سمجھے

نہ ہرگز خوں رلائے بلبلوں کو باغ میں اے گل

جو اپنے حسن کو تو طائر رنگ حنا سمجھے

ترے آئینۂ رخ کو سکندر دیکھنے آیا

تری محفل میں ہم اس کو گدائے بے نوا سمجھے

کوئی کیا جانتا ہے کس قدر بوسے لیے ہم نے

سمجھتے ہیں ہم اس کو یا ہمارا دل ربا سمجھے

بتوں سے ہم نے جوڑا رشتۂ دل کو وہ کافر ہے

اگر اس رشتہ کو کوئی ہمارے ناروا سمجھے

تو جا کر چھیڑ گل کو یا کسی کی زلف پیچاں کو

چل اے باد صبا تو کیا مری ناز و ادا سمجھے

کبھی بیٹھا بھی گر دیکھا انہوں نے اپنے کوچہ میں

تن لاغر کو میرے وہ کسی کا نقش پا سمجھے

بیاباں میں جو آیا کوئی جھونکا باد‌ صر‌صر کا

تری ہم سرد مہری سے نسیم جاں فزا سمجھے

وہی ہیں ہم بنایا جو ہمیں حق نے نہیں پروا

کوئی ہم کو برا سمجھے کوئی ہم کو بھلا سمجھے

بھلے کو گر برا سمجھے نہ ہرگز وہ برا ہوگا

بھلا اس میں برا کیا ہے برے کو گر برا سمجھے

ہے انساں کے لیے لازم جہاں میں دیکھ کر چلنا

وہ ہے حیواں نہ دل میں جو زمانے کی ہوا سمجھے

اگر اس نے کبھی توڑا ہمارے گوہر دل کو

ہم اس کے حق میں اس کے ٹوٹنے کو مومیا سمجھے

پگھل کر شمع خود پروانہ کو پہلے جلاتی ہے

کسی کے موم ہونے کو نہ کوئی مومیا سمجھے

گریباں ہم نے دکھلایا انہوں نے زلف دکھلائی

ہمارا سمجھے وہ مطلب ہم ان کا مدعا سمجھے

خدا کو سمجھے تم پتھر جو پتھر کو خدا سمجھے

اگر سمجھے اسے پتھر تو پھر تم اس کو کیا سمجھے

طریق خاکساری سلم بام بزرگی ہے

اسی کو مشرقیؔ انساں جہاں میں کیمیا سمجھے

bajuz saya tan-e-laghar ko mere koi kya samjhe

miri surat ko mahfil mein wo naqsh-e-boriya samjhe

ham us ko apne haq mein afat-e-jan aur bala samjhe

butan-e-be wafa hain jin ko ik apni ada samjhe

koi kya khak raz mushkil zat-e-khuda samjhe

agar nur-e-khuda ko zat-e-insan se juda samjhe

wahan ja kar kare gar qatl to bimar-e-hijran ko

tire kucha ko apne haq mein wo dar-e-alshshifa samjhe

siyah bakhti pe saya gar ho teri zulf-e-shab gun ka

use wo apne sar pe saya-e-bal-e-huma samjhe

wahi karta hai insan kam jo qismat karati hai

koi chahe use samjhe rawa ya narawa samjhe

latakte dekha sina par jo tere tar-e-gesu ko

use diwane wahshat mein tira band-e-qaba samjhe

na hargiz khun rulae bulbulon ko bagh mein ai gul

jo apne husn ko to tair-e-rang-e-hina samjhe

tire aina-e-rukh ko sikandar dekhne aya

tiri mahfil mein ham us ko gadae be nawa samjhe

koi kya janta hai kis qadar bose liye ham ne

samajhte hain ham us ko ya hamara dil ruba samjhe

buton se ham ne jora rishta-e-dil ko wo kafir hai

agar is rishta ko koi hamare narawa samjhe

tu ja kar chher gul ko ya kisi ki zulf-e-pechan ko

chal ai bad-e-saba to kya miri naz-o-ada samjhe

kabhi baitha bhi gar dekha unhon ne apne kucha mein

tan-e-laghar ko mere wo kisi ka naqsh-e-pa samjhe

bayaban mein jo aya koi jhonka bad-e-sarsar ka

tiri ham sard mehri se nasim-e-jan faza samjhe

wahi hain ham banaya jo hamen haq ne nahin parwa

koi ham ko bura samjhe koi ham ko bhala samjhe

bhale ko gar bura samjhe na hargiz wo bura hoga

bhala is mein bura kya hai bure ko gar bura samjhe

hai insan ke liye lazim jahan mein dekh kar chalna

wo hai haiwan na dil mein jo zamane ki hawa samjhe

agar us ne kabhi tora hamare gauhar-e-dil ko

ham us ke haq mein us ke tutne ko momiya samjhe

pighal kar shama khud parwana ko pahle jalati hai

kisi ke mom hone ko na koi momiya samjhe

gareban ham ne dikhlaya unhon ne zulf dikhlai

hamara samjhe wo matlab ham un ka muddaa samjhe

khuda ko samjhe tum patthar jo patthar ko khuda samjhe

agar samjhe use patthar to phir tum us ko kya samjhe

tariq-e-khaksari sullam bam-e-buzurgi hai

usi ko mashriqi insan jahan mein kimiya samjhe