ظلمت دشت عدم میں بھی اگر جاؤں گا

ظلمت دشت عدم میں بھی اگر جاؤں گا

لے کے ہمراہ مہ داغ جگر جاؤں گا

عارض گل ہوں نہ میں دیدۂ بلبل گلچیں

ایک جھونکا ہوں فقط سن سے گزر جاؤں گا

اے فنا ٹوٹ سکے گی نہ کبھی کشتی عمر

میں کسی اور سمندر میں اتر جاؤں گا

دیکھ جی بھر کے مگر توڑ نہ مجھ کو گلچیں

ہاتھ بھی تو نے لگایا تو بکھر جاؤں گا

ایک قطرہ ہوں مگر سیل محبت سے ترے

ہو سکے جو نہ سمندر سے بھی کر جاؤں گا

دور گلشن سے کسی دشت میں لے جا صیاد

ہم صفیروں کے ترانوں میں تو مر جاؤں گا

صحن گلشن میں کئی دام بچھے ہیں اے اثرؔ

اڑ کے جاؤں بھی اگر میں تو کدھر جاؤں گا

zulmat-e-dasht-e-adam mein bhi agar jaunga

le ke hamrah mah-e-dagh-e-jigar jaunga

ariz-e-gul hun na main dida-e-bulbul gulchin

ek jhonka hun faqat sun se guzar jaunga

ai fana tut sakegi na kabhi kashti-e-umar

main kisi aur samundar mein utar jaunga

dekh ji bhar ke magar tor na mujh ko gulchin

hath bhi tu ne lagaya to bikhar jaunga

ek qatra hun magar sail-e-mohabbat se tire

ho sake jo na samundar se bhi kar jaunga

dur gulshan se kisi dasht mein le ja sayyad

ham safiron ke taranon mein to mar jaunga

sehn-e-gulshan mein kai dam bichhe hain ai asar

ur ke jaun bhi agar main to kidhar jaunga