عاشق گیسو دوتا ہوں میں

عاشق گیسو دوتا ہوں میں

آپ اپنے لیے بلا ہوں میں

کیا شکایت اگر نہ جانے یار

خود نہیں جانتا کہ کیا ہوں میں

مثل گل ہنس کے میں کبھی نہ کھلا

غنچہ ساں زیست سے خفا ہوں میں

میں تو اے جان ہوں برے سے برا

میرا یہ منہ کہوں بھلا ہوں میں

دل ہے آئینۂ دو رو اپنا

دوست دشمن سے ایک سا ہوں میں

تیرا عاشق ہوں اے بت رعنا

غیر ہوں میں کہ آشنا ہوں میں

مجھ کو تسلیم ہے جفائے یار

ہر طرح تابع رضا ہوں میں

موج نکہت مرا جنازہ ہے

کشتۂ خنجر ادا ہوں میں

پھر چبھا دل میں خار غم ہے وقارؔ

پھر کسی گل کا مبتلا ہوں میں

ashiq-e-gesu-e-duta hun main

ap apne liye bala hun main

kya shikayat agar na jane yar

khud nahin janta ke kya hun main

misl-e-gul hans ke main kabhi na khula

ghuncha san zist se khafa hun main

main to ai jan hun bure se bura

mera ye munh kahun bhala hun main

dil hai aina-e-do ro apna

dost dushman se ek sa hun main

tera ashiq hun ai but-e-raana

ghair hun main ke ashna hun main

mujh ko taslim hai jafa-e-yar

har tarah tabe-e-raza hun main

mauj-e-nikhat mira janaza hai

kushta-e-khanjar-e-ada hun main

phir chubha dil mein khar-e-gham hai waqar

phir kisi gul ka mubtala hun main