عاشق کے لیے ہجر کا آزار کہاں تک

عاشق کے لیے ہجر کا آزار کہاں تک

دکھ سہتا رہے آپ کا بیمار کہاں تک

آخر یہ ستم چرخ جفاکار کہاں تک

جھیلے مرض ہجر دل زار کہاں تک

ہو جائے لب بام سے اب جلوہ نمائی

بیٹھا رہوں آخر پس دیوار کہاں تک

دیکھوں جو کبھی آؤ سوئے گور غریباں

جی اٹھتے ہیں مردے دم رفتار کہاں تک

آتا نہیں اب کوئی عیادت کو بھی اے دل

بہلاتے بھلا بیٹھ کے غم خوار کہاں تک

سجدہ ہی کی خو ڈالوں کہ مقبول ہو خدمت

بیٹھا رہوں در پر ترے بے کار کہاں تک

کرنا نہ حقیرؔ آبلہ پائی کی شکایت

دیکھو تو رہ عشق ہے دشوار کہاں تک

ashiq ke liye hijr ka azar kahan tak

dukh sahta rahe ap ka bimar kahan tak

akhir ye sitam charkh jafakar kahan tak

jhele maraz-e-hijr dil-e-zar kahan tak

ho jae lab-e-bam se ab jalwa numai

baitha rahun akhir pas-e-diwar kahan tak

dekhun jo kabhi ao su-e-gor-e-ghariban

ji uthte hain murde dam-e-raftar kahan tak

ata nahin ab koi ayadat ko bhi ai dil

bahlate bhala baith ke gham khwar kahan tak

sajda hi ki khu dalun ke maqbul ho khidmat

baitha rahun dar par tire be kar kahan tak

karna na haqir abla pai ki shikayat

dekho to rah-e-ishq hai dushwar kahan tak