عاشق تو ملیں گے تجھے انساں نہ ملے گا

عاشق تو ملیں گے تجھے انساں نہ ملے گا

مجھ سا تو کوئی بندۂ فرماں نہ ملے گا

ہوں منتظر لطف کھڑا کب سے ادھر دیکھ

کیا مجھ کو دل اے طرۂ جاناں نہ ملے گا

کہنے کو مسلماں ہیں سبھی کعبے میں لیکن

ڈھونڈوگے اگر ایک مسلماں نہ ملے گا

ناصح اسے سینا ہے تو اب سی لے وگرنہ

پھر فصل گل آئے یہ گریباں نہ ملے گا

رہنے کے لیے ہم سے گنہ گاروں کے یا رب

کیا شہر عدم میں کوئی زنداں نہ ملے گا

ہونے کی نہیں تیری خوشی سرو خراماں

تا خاک میں یہ بے سر و ساماں نہ ملے گا

دل اس سے تو مانگے ہے عبث مصحفیؔ ہر دم

کیا فائدہ اصرار کا ناداں نہ ملے گا

ashiq to milenge tujhe insan na milega

mujh sa to koi banda-e-farman na milega

hun muntazir-e-lutf khara kab se idhar dekh

kya mujh ko dil ai turra-e-janan na milega

kahne ko musalman hain sabhi kaabe mein lekin

dhundoge agar ek musalman na milega

naseh use sina hai to ab si le wagarna

phir fasl-e-gul ae ye gareban na milega

rahne ke liye ham se gunah garon ke ya rab

kya shahr-e-adam mein koi zindan na milega

hone ki nahin teri khushi sarw khiraman

ta khak mein ye be sar-o-saman na milega

dil us se to mange hai abas mushafi har dam

kya faida israr ka nadan na milega