ظالم بتوں سے آنکھ لگائی نہ جائے گی

ظالم بتوں سے آنکھ لگائی نہ جائے گی

پتھر کی چوٹ دل سے اٹھائی نہ جائے گی

ہونے دو ہو رہے ہیں جو الفت کے تذکرے

بگڑوگے تم تو بات بنائی نہ جائے گی

کہہ دو یہ شمع سے کہ عبث تو ہے اشک بار

پانی سے دل کی آگ بجھائی نہ جائے گی

چلمن ہو یا نقاب ہو یا پردۂ حیا

صورت تری کسی سے چھپائی نہ جائے گی

ممکن ہے تیر ناز سے دل کو بچا بھی لوں

لیکن نظر کی چوٹ بچائی نہ جائے گی

آنکھیں خدا نے دی ہیں تو دیکھیں گے حسن یار

کب تک نقاب رخ سے اٹھائی نہ جائے گی

توبہ کو منہ لگا کے خجل ہوگے تم جلیلؔ

جام و سبو سے آنکھ ملائی نہ جائے گی

zalim buton se ankh lagai na jaegi

patthar ki chot dil se uthai na jaegi

hone do ho rahe hain jo ulfat ke tazkire

bigroge tum to bat banai na jaegi

kah do ye shama se ke abas to hai ashk bar

pani se dil ki ag bujhai na jaegi

chilman ho ya naqab ho ya parda-e-haya

surat tiri kisi se chhupai na jaegi

mumkin hai tir-e-naz se dil ko bacha bhi lun

lekin nazar ki chot bachai na jaegi

ankhen khuda ne di hain to dekhenge husn-e-yar

kab tak naqab-e-rukh se uthai na jaegi

tauba ko munh laga ke khajil hoge tum jalil

jam-o-subu se ankh milai na jaegi