شب وصل روٹھا ہے دلبر کسی کا

شب وصل روٹھا ہے دلبر کسی کا

نہ یوں بن کے بگڑے مقدر کسی کا

غش آیا جو مجھ کو تو ظالم یہ بولا

نہ رکھیں گے زانو پہ ہم سر کسی کا

مسہری پہ پھولوں کی سوتا ہے کوئی

تڑپتا ہے کانٹوں پہ مضطر کسی کا

گئے وہ تو تقدیر پھوٹی کسی کی

وہ آئے تو چمکا مقدر کسی کا

دم قتل بھی منہ پھرائے ہوئے ہے

بڑا بے مروت ہے خنجر کسی کا

وہ دیکھا کئے لے کے سیماب پہروں

جو یاد آ گیا قلب مضطر کسی کا

صبا جا کے چپکے سے کہنا کسی سے

دل آیا ہے اے شوخ تجھ پر کسی کا

پس مرگ آیا جو تربت پہ قاصد

تو رویا بہت نام لے کر کسی کا

شب وصل میرا کچھ اصرار کرنا

بڑھانا وہ شرما کے زیور کسی کا

نہ پامال کر اس کو غنچہ سمجھ کر

یہ دل ہے ارے او ستم گر کسی کا

تڑپتا ہے نوشادؔ فرقت میں ہر دم

جدا ہو کسی سے نہ دلبر کسی کا

shab-e-wasl rutha hai dilbar kisi ka

na yun ban ke bigre muqaddar kisi ka

ghash aya jo mujh ko to zalim ye bola

na rakhenge zanu pe ham sar kisi ka

masahri pe phulon ki sota hai koi

tarapta hai kanton pe muztar kisi ka

gae wo to taqdir phuti kisi ki

wo ae to chamka muqaddar kisi ka

dam-e-qatl bhi munh pharae hue hai

bara be murawwat hai khanjar kisi ka

wo dekha kiye le ke simab pahron

jo yad a gaya qalb-e-muztar kisi ka

saba ja ke chupke se kahna kisi se

dil aya hai ai shokh tujh par kisi ka

pas-e-marg aya jo turbat pe qasid

tu roya bahut nam le kar kisi ka

shab-e-wasl mera kuchh israr karna

barhana wo sharma ke zewar kisi ka

na pamal kar us ko ghuncha samajh kar

ye dil hai are o sitam gar kisi ka

tarapta hai naushad furqat mein har dam

juda ho kisi se na dilbar kisi ka