شب فراق میں رویا کیا سحر کے لئے

شب فراق میں رویا کیا سحر کے لئے

ترس ترس گئیں آہیں مری اثر کے لئے

الٰہی خیر سے اس کی خبر ملے مجھ کو

چھری ہے تیز وہاں مرغ نامہ بر کے لئے

بجا ہے بوسے کا گر نیل بن گیا رخ پر

یہی تو داغ مناسب تھا اس قمر کے لئے

مریض ہجر نے دی جان تیری غفلت سے

نہ آیا ایک دن او بے خبر خبر کے لئے

زیادہ فرط نزاکت سے سرگراں وہ ہوئے

لگا لیا کبھی صندل جو درد سر کے لئے

پیام اس بت شیریں ادا کا جب لایا

بڑھا کے ہاتھ قدم ہم نے نامہ بر کے لئے

جو مہر حشر مرے داغ دل کا پھاہا ہو

روا ہے ابر کا رومال چشم تر کے لئے

خیال زلف میں دن رات ہم ہیں سرگرداں

ازل سے تھا یہی سودا ہمارے سر کے لئے

دعائیں مانگنا ہوں جتنی مانگ لے وہبیؔ

کھلا ہے باب اجابت ابھی اثر کے لئے

shab-e-firaq mein roya kiya sahar ke liye

taras taras gain ahen miri asar ke liye

ilahi khair se us ki khabar mile mujh ko

chhuri hai tez wahan murgh-e-nama bar ke liye

baja hai bose ka gar nil ban gaya rukh par

yahi to dagh munasib tha is qamar ke liye

mariz-e-hijr ne di jan teri ghaflat se

na aya ek din o be khabar khabar ke liye

ziyada fart-e-nazakat se sargiran wo hue

laga liya kabhi sandal jo dard-e-sar ke liye

payam us but-e-shirin ada ka jab laya

barha ke hath qadam ham ne nama bar ke liye

jo mehr hashr mire dagh-e-dil ka phaha ho

rawa hai abr ka rumal chashm-e-tar ke liye

khayal-e-zulf mein din rat ham hain sargardan

azal se tha yahi sauda hamare sar ke liye

duaen mangna hun jitni mang le wobi

khula hai bab-e-ijabat abhi asar ke liye