شب غم میں چھائی گھٹا کالی کالی

شب غم میں چھائی گھٹا کالی کالی

جھکی ہے بلا پر بلا کالی کالی

بہت ایسے کالے ہرن ہم نے دیکھے

دکھاتے ہیں آنکھیں وہ کیا کالی کالی

ڈٹے مل کے رند سیہ مست جس دم

جھکی میکدے پر گھٹا کالی کالی

شب ماہ میں وہ پھرے بال کھولے

ہوئی چاندنی جا بجا کالی کالی

یہ سجدے کو خود جھک پڑے گی چمن پر

کہ قبلے سے اٹھی گھٹا کالی کالی

کھلی سب پر آخر تری گرم دستی

ہوئی کھولتے ہی حنا کا کالی کالی

لنڈھا دے مے سرخ تو اب تو ساقی

گھٹا اٹھی ہے دیکھ کیا کالی کالی

مرے کعبۂ دل کے مٹنے کا غم ہے

جو اوڑھے ہے کعبہ صبا کالی کالی

ہوئے ہیں سیہ بخت برباد لاکھوں

اٹھیں آندھیاں بارہا کالی کالی

بخارات دل آہ پر چھا گئے ہیں

گھٹا ہے بروئے ہوا کالی کالی

میں دیکھوں گا منہ ان کا دے کر یہ فقرہ

تری شکل ہے مہ لقا کالی کالی

سیہ نامۂ قدرؔ محشر میں نکلا

اٹھی دھوپ میں اک گھٹا کالی کالی

shab-e-gham mein chhai ghata kali kali

jhuki hai bala par bala kali kali

bahut aise kale hiran ham ne dekhe

dikhate hain ankhen wo kya kali kali

date mil ke rind-e-siyah mast jis dam

jhuki maikade par ghata kali kali

shab-e-mah mein wo phire bal khole

hui chandni ja baja kali kali

ye sajde ko khud jhuk paregi chaman par

ke qible se uthi ghata kali kali

khuli sab par akhir tiri garm dasti

hui kholte hi hina ka kali kali

lundha de mai surkh to ab to saqi

ghata uthi hai dekh kya kali kali

mire kaaba-e-dil ke mitne ka gham hai

jo orhe hai kaaba saba kali kali

hue hain siyah bakht-e-barbad lakhon

uthen andhiyan barha kali kali

bukharat dil ah par chha gae hain

ghata hai baru-e-hawa kali kali

main dekhunga munh un ka de kar ye fiqra

tiri shakl hai mah liqa kali kali

siyah nama-e-qadr mahshar mein nikla

uthi dhup mein ik ghata kali kali